阿芳心曲

2014/12/21(日)

這日，天時當寒，臨晝仔邊還落雨。

我朝晨運動轉來就無出門，等到愛出門時節正發現落雨咧，

高不將坐嗨亞(小黃)去同事个屋下，佢前幾日邀請去食晝，

講麼个厥个新來个印尼嫲已會煮食，愛請大家食印尼菜。

其實，我乜當為難，

既經同吾妹仔約好今晡日愛陪佢食牛肉麵(義美手工麵速食包，兩人份160元)；

這下又講變就變。

因爭，同事係發過大病、行動無利便个人，

佢單淨同外勞兩儕共下贌一間一房一廳一廚一廁个屋仔戴等，

佢當需要同朋友做交流啊。

我講我愛煮粄圓去，佢吩咐我去到厥屋下正來煮；

偏偏我就執性愛在自家屋下煮好，驚怕別人个灶下用毋慣。

結果，歸鑊無麼个湯汁个鹹粄圓裡肚个艾菜、韭菜，做盡變黃種，嗄無餳人食。

因為今晡朝晨在台北東區有毋知麼个單位舉辦[路走]活動，

塔悠路、基隆路、南京東路這兜最遽到个路線，交通全部打結。

阿姆哀哟!無愐著會堵著恁仰个尷尬，

坐在計程車裡背停動毋德，好得運將會尋路行，花忒百六個銀。

去到厥屋下，主人交代先到先食，有人會較慢來，

我無細義，頭磬磬仔先齕一肚飽，正想著愛翕相下來留念。

1.煠个青菜搵印尼samˇ-barerˋ醬   這青菜當爽口好食。

2.印尼風味薑黃椰漿香茅香蘭......燒雞塊，慢火炒黃的紅蔥頭末&蒜頭片鋪其上

  這道無辣椒仔，也毋會忒鹹，最合吾个胃口。

3.泰式香檬酸辣魚

4.排骨炆蘿蔔(自製)肉丸湯  

5.吾个粄圓:無放香菇&金鉤乾蝦仁，感覺[不到味]。

6.紅豆芋頭薑片椰漿甜湯

大家食到當歡喜 

食飽晝，阿霞老師有[草月流]日本考著證照个插花達人應主人之託插了三盆花 :

1.小熊耶誕  

2.廟宇清供

3.生日快樂

在這其間，我跈等印傭蜜娜又做了一道下晝茶个點心。

  紅糖心糯米球裹椰蓉

靚靚个星期放尞一下仔就過忒哩咧，

毋使愁啊毋使𤸁，

日日好過日日過。

P.S.1:吾个阿哪達老周偕同家娘跈等兩位小娘姑兩公婆等等屋下人，

一共八儕，今餔日起做三天兩夜【台東行】个遶遼，真多謝。同時

乜祝福  親朋好友們

喜樂連連保安康

P.S.2: