郭姊大作  

 

      每日朝晨我打開平板,定著看着頭份鄉親頭擺(從前)雅虎、痞邦格友   LKK傳來个靚靚个照片同問候,五月節過吂(還沒)七月半正放避暑(暑假),差毋多兩個零月前,我抽間(抽空)轉妹家,去尋佢(她)尞,對過年到這我毋識轉去頭份,無轉去自然就無機會同親切又當有話好講个梅珍姊談哆(聊天)。

 

      昨晡晡朝晨佢既經傳分我澎湖七美嵎雙心魚滬个分享,包尾又現場分享厥(giaˊ她的)屋脣自家種个茉莉花分我,我黏時(立即、馬上)感受着郭姊燒暖溫馨淰淰(滿滿)个愛,親像茉莉花清香鑽入吾个鼻公咧。感恩   感謝 ,   人生个朋友毋使多,有一、兩儕做得講心肚話,分享生活个歡喜同愁慮个就值千金咧。

 

      親像我去參加鄧導个火焰蟲客語社團,認識了林少英先生,知得[Accpelila無伴奏合唱]係美國黑人爵士音樂演唱,演唱者唱出靈魂深處真誠心聲,聲音感動自家同大自然所有有情者;我乜當珍惜同恁多湛斗个客家鄉親前輩共下來[搞生趣个客家]。毋過,這兩三月个每拜四暗晡兩點鐘个上課,我無盡認真,輒輒(經常)遲到缺席,等到8/28愛驗收成果、登台發表前5日,我偏着腳㬹(腳踝)行動無利便,差一息仔上不了台。

 

      該日暗晡跈等大家上台搞一輪(玩一趟),好得驚驚險險可能有入選[初賽]个機會,續下來愛仰般(如何)來加強練習,增加凝聚力,往更深、闊面向精益求精,係enˊ(我們)Eagles家族愛共下來面對挑戰爭取勝利的機會。今晡暗晡就愛去教室集思廣議檢討補強,大家來參詳愛仰般來同節目裝到較靚、較精緻兜仔。愛搞,就愛搞出一隻較湛个色目,分傳統客家說唱藝術有更大个突破同創新。大家加油!

 

 

      上禮拜四臨暗仔正接着香香先生通知,講筆會阿堯哥既來242頁 A4 12號字个文稿有開始校稿吂 ? 阿姆哀(我的媽)啊! 差無多個過月(個把月)前既經收着个本【散文選】,我擲在旁脣無插佢,原來係恁樣一回事啊!這中央,除忒兩擺出門演練&表演,其他時間一抹煞煞猛低頭看文稿,因爭佢無法度電子檔直接改文章,愛一隻一隻字用紅筆勾出來訂正好,又正交分專人在印刷廠特有个電腦版進行,恁大條个工程,恁多人搣下來,正經屙悿屎,全食目珠,歸禮拜下來,眼茫鼻花,實在堵毋著(受不了)!毋過,較艱苦,乜愛擔輸贏,接人个事,就愛做下去。[受人之託,忠人之事]!

 

      好得無閒直掣一禮拜,今晡下晝寄轉該文本,黏時(立即、頓時)肩頭个重擔放下,輕鬆快樂!旋風蒸好一細垤黃菩麻仔堅果粄犒賞自家。

 

      這期間懈怠(怠慢)親愛个好友,請大自家多多包涵。

承蒙你

恁仔細

 

         郭姊攝於160831自宅

               

 

 

 

 

 

 

 

  

arrow
arrow

    阿芳 發表在 痞客邦 留言(14) 人氣()