阿芳心曲

吾爸民國61年過身既經44年半咧。厥个生日，新曆11月23，挷前11/20拜日老弟招大家來拜阿爸，順續拜嘴空食飯打嘴鼓。大老弟[退而不休]，歸日無閒頭路，還愛打理屋下大細事，𠊎同佢承領當晝擎鑊鏟个任務，因為本身就毋好去外背餐廳食飯，除非有特殊个光景。

毋過，既然承領了煮食个責任，就愛擔輸贏無好澇潰正好。大老弟真會![倈仔準心臼]，買雞蒸雞擺三牲，還會滷豬腳，烳四神湯，提前削好个四色水果，茶杯洗淨泡好茶，一抹煞自家先準備好。細老弟歸家也打早對林口拚轉來。堵好，吾倈仔拜五對高雄上來台中出差，該日佢先載𠊎去珊珠湖，𠊎在屋下打理準備，炒一鑊米粉咧，佢兜拜阿公婆儕轉來，細老弟、老弟心臼同𠊎𢯭手，兩個姪仔做[跑堂]，𠊎輕輕鬆鬆就擺出10過盤个菜，大家食到歡喜靂天。

在屋下食飯安然自在氣氛好，食料安全較衛生。

毋過，屋下大細愛互相分擔頭路。

𠊎在自家屋下感絕大家扛等事共下做，

心情輕鬆當快樂。

頭一日，在通霄，𠊎做饅頭、花捲，

用同學素珍送个洛神花蜜餞同錫蘭橄欖(太平洋榅桲)蜜餞做。

緊做緊心焦，

愐起吾爸恁後生就見背，

毋知係幸抑係不幸?

𠊎同吾棟叔講起，

佢講吾爸一生人毋運，

才人無運，

也無奈何!

感謝吾老弟安排這餐[餐敘]。

打幫這機會，親戚好友來打嘴鼓:

講起立法院通過同性結婚的議題，

大家就有意見，

𠊎戇戇　麼个就毋知，

淨聽人講就當有意思。

春枝叔姆[發蛇]在左片目珠脣透頭那頂，

三年來嘖嘖牯痛，

佢講打幫這時間同大家談哆，

暫時豁忒這痛。

呵~~~

花無百日紅，

人無千日好。

大家愛自我保重。