這一棧仔專專做包仔、蒸饅頭,一到尞日就頭犁犁仔在狹之狹蹶个灶下滅東搣西,這乜係一種生活趣味个過日子方式。對一斤麵粉開始搣,最多乜正做三斤定定,吂知吾老公大手路,麼个在網路買可靠穩當个麵粉,全榖類同白麵粉各10公斤,一包10公斤就係16台斤,阿姆哀啊!𠊎聽着就懶頭,[回嗆]:你自家去做哪!
斷真佢恁慶,昨暗晡在通霄,蒸2斤麵粉,三股一股全榖麥、三股二股白麵粉,做了11隻大饅頭。𠊎吂下南轉屋下,想天光日打早轉去看看啊!係正經恁會,𠊎就做得交腳拈鬚菇了!
在台北,𠊎乜做芋仔粄:
1.材料:芋仔(刨淨皮)大約2斤;糯米粉1杯、在來米粉3/5杯。
2.配料:紅蔥頭2兩;梅花肉丁片4兩;乾蝦仁1兩、香菇5朵。
3.做法:
(1). 將2.配料用少許油(白麻油)一一爆香
(2).剉簽个芋仔倒入鑊頭炒到半熟。
(3).加入粉漿(米粉混合+1杯水攪拌均勻)
(4).充分拌炒均勻,就落籠床:
(5).水滾後,蒸25~30分鐘就好了。
今年芋仔大出,上禮拜在通霄1斤55,買削好个1斤60,買來做饅頭。
這星期五當晝在台北收攤價1斤正30,4斤100,品質無恁好。共樣有芋仔香!
想食就自家停動一下,利便又衛生。
親像吾桃園个好朋友阿瑞真,
佢正分享包咧60隻南部粽,平均一隻粽仔本錢15個銀,實在值食。
恁仔細
承蒙你
文章標籤
全站熱搜
留言列表