上禮拜228四連假一眨目就過忒咧,
連續三日在屋下擎鍋鏟,
無擔輸贏,肩頭拗蠻痛。
既經尞咧一禮拜咧,
乜還有感覺無鬆爽。
有咧歲數,每項事愛測等來做,
做毋得執性放勢仔做過頭。
2/27(一)舊曆二月二
伯公生(土地公生日)。
該朝晨本本上虎頭山想愛做氣功,
毋過運動伴無來,自家在山項行一輪,
正下山,去市場買菜時節,
堵着運動伴阿粉姊个老公,
佢笑微微仔同我相借問,我嗄問佢:
[請問上姓大名?我在哪位熟事你?]
[姓葉,名安到瑞利......]我還係戇戆,
佢看我歸面疑狐,續等講我坐過厥車去明德水庫,
聽着[明德水庫],我正愐起佢係阿粉姊个老公,
還敗勢哦!去佢个屋下幾下擺咧,還認毋識人。
(第二朝晨阿粉姊有來做運動,還渡我跳國標舞,當好搞!)
虎頭山頂个伯公廟,
打早6:00零就有人來拜喏。
長長榕樹廊
恬恬無人聲
就愛這恬靜
行路有味緒
七里香步道
往頂高行去
就係[台灣光復紀念碑]
日俄戰爭炮台遺址
包尾下來[通霄虎頭山神社]
青青个松樹同紅紅个楓葉任打眼
二月二个朝晨
伯公生日快樂
文章標籤
全站熱搜
留言列表