阿芳心曲

今晡朝晨興嘟嘟仔行入學校，

警衛室老楊分享1111拜六去淡水看着个好光景，

佢係吾中山社大[台語雅俗面面觀]前後期打宕窿个同學。

𠊎聽到入文，  感覺水筆仔、招潮毛蟹仰恁生趣?

頭擺到今𠊎毋識个經驗，佢仰會看得着?

還會隨口唸出押韻个詩句。

實在有慶哟!

看着生態細陂塘肚兩蕊靚妮妮个白蓮花，

嗄無帶着相機，該央時無想着拿手機仔來翕啊。

實在有𤘅奓!

等到當晝下課咧行出來，看着大蕊个花凹ngiabˋ下來咧，

靚靚好風光一𥍉ngiabˋ目就無忒咧!

行入屋下樓下，管理員同𠊎講，

對面水電行个水電工12該暗晡為錢㓾死歐巴桑个微毛末節，

鄰舍隔壁痛惜這32歲个兇手，沉默低調，樸實省儉，

仰般就看毋出佢仰會欠卡債。

蛤!仰般有㓾人个勇氣?

恁得人驚个新聞就發生在吾屋脣。

包尾，3:00零咧，𠊎同台南个老妹line，佢看報紙報導，

同𠊎分享歸拖羅，原來秀才不出門能知天下事，顛倒

歇命案發生地屋脣个𠊎，麼个都毋知。

注釋:　

1.前後期打宕tong窿lungˇ:前後撞期

2.有[慶]:kiang   啵棒

3.[兩蕊靚妮妮]个白蓮花:兩朵漂漂亮亮

4.實在有[𤘅奓]:nga    da     愚蠢

5.花[凹ngiabˋ]下來咧:蔫了

6.[一𥍉ngiabˋ目]就[無忒]:[一眨眼]就[消逝]了

7.水電工12該暗晡為錢㓾死歐巴桑个微毛末節:水電工1112那晚為財殺死73歲婦人的點點滴滴

8.仰，仰般:怎麼?

9.歸拖羅:全部一大籮筐