阿燿哥同我在Line喜相逢,日日會寄當靚个相片分𠊎。基隆港前棧仔有大船入來,先係戴七堵个雄哥用手機翕來後兩張放在野虎登山隊群組項,接等燿哥就寄來前三張較專業个相機翕个相片。真多謝好朋友个分享。
昨晡朝晨轉去通霄,感覺家娘神清氣爽,靚過觀音娘,感謝吾老公陪伴同照顧,分𠊎相當做自家个自由,不孝倈仔三餐燒,有孝妹仔路項搖啊搖啊!
今晡朝晨佢兜叔伯兄弟講好愛去[梅仔樹下](地名)祭拜周家來臺祖風水遷徙个儀式。當晝接受阿銘哥邀請,在厥屋下食晝,阿貞嫂無在,𠊎過去𢯭ten手。佢一個男仔人毋多知仔就當會煮食,套阿溪大哥講个,「家教異好」,哈!朝晨六七點鐘就開始準備,等我9:00邊仔過去,佢全準備好勢咧,伸兩三樣切好愛落鑊炒个定定。吂到11:00就好食飯咧。
一張桌淰淰12盤魚魚肉肉,還有白菜滷同豆乾湯兩大碗公,9儕叔伯兄弟子嫂同吾家娘食到歡喜到耐毋得,正放啊忒飯碗,吾小郎叔轉來乜過來坐尞,在臺灣个阿公派下个孫仔做盡到場咧,嗨到最高點啊!
大哥,二哥兩公婆四儕續等坐下晝2:30莒光號轉臺北;妹仔,大小娘姑兩公婆也轉來,毋過我坐4:06復興號隨後上北,天下哪有不散个筵席?
過咧精彩快樂个週末,雖然油桐花鬧煎煎開始打花嗄無閒欣賞,同家人、親戚共下談哆正係正經个幸福同歡喜啊。
恁仔細
承蒙你
感恩 阿洋兄嫂攝影留念:
四個叔伯子嫂(堂兄弟的另一半)
中坐者就係老菩薩 吾屋下90歲个家娘
阿銘哥準備豐沛个一餐晝
餐後泡茶、食酒、啉咖啡:
真多謝
勞瀝
文章標籤
全站熱搜
留言列表