昨晡日8/31在文水藝文中心,
跈等少英先生教一個20儕左右个團體搞流行音樂創作。
擔名係[助教],同後生細阿哥、細阿妹「共下飛翔」,
歸日仔下來,身心受到安慰挲平,
前三日三夜為著照顧家娘个酸軟痛也得著平衡咧。
「共下飛翔」係北市客委會委託橘子公司製作个一個訓練課程。
8/29起六週,每週三、五10:00~17:00,
胡兄同𠊎負責客語正音導讀个協助,
下星期起事,
𠊎朝晨有課、單淨做得參加下晝个課程,
一抹煞就愛靠胡兄全程照顧哟。
8/29[始業式]赴毋掣,8/31正入來團隊,
害𠊎著一下驚,阿姆哀啊!
正上過一堂課,第二堂就做得大合奏,
吹唱出湛斗个歌曲。
2018/09/01(六)
昨暗晡感覺還恁悿,需要大睡一場。
朝晨發現間房肚浴堂个電火一夜點到天光,
哈~~[節電]破功咧!
放在浴堂(兼倉庫)个油畫色彩箱仔肚个松節油流流流流
既經好多日咧,
還吂抽間去處理收揫。
一打早就開始整理抹捽,拚忒一大袋垃圾。
續等陽台个蘭花有兜燥兮燥兮,有兜仔綿根綿根咧,
做下重新換盆種過。
恁樣,搣咧三點鐘,9:00零肚飢咧,
正煞煞[停工]另日正繼續。
煮一鑊熟[鹹豬肉炆竹筍蕨干],食朝𠊎最大!
看咧MOD本週免費電影【擊劍大師】,
敘述俄羅斯史達林恐怖統治時期个一位下鄉服務个體育老師,
同學生、家長中間溫馨感人个故事,
還有一滴仔同女老師戀愛个插曲。
[不自由,寧可死],為著人間最光明个【愛】麼个就做得擲忒。
這先生為著對學生仔个【愛】,甘願分人捉去坐稈仔;
為著【愛】,等史達林死忒,佢也平安轉到愛沙尼亞鄉下同愛人共渡一生。
親像前幾日,吾家娘正入院起事就緊累luiˊ追duiˊ(如同小孩般不講理吵鬧)講:
「𠊎無愛戴在醫院,坐稈仔(坐牢)樣仔,
分𠊎幾日抑幾十分鐘自由就好;
同阿華講毋使送來醫院,你兜艱苦𠊎乜苦。」
拜二胃出血入院五日,今晡日拜六朝晨出院。
這下有印尼嫲𢯭幫,希望家娘康健安樂。
恁仔細
承蒙大家
留言列表