阿芳心曲

  一連三個禮拜轉去通霄屋下關心老人家，講正經體力無後生時節恁足，有兜仔悿。毋過，親像澳洲轉來看阿姆个小娘姑講:「老哀仔同七隻月前比起來，天差地差差恁多!」一個老人家老化、退化个緊板，實在得人畏!

一個人毋會行路，又無愛坐輪椅，等於同外界截斷無交流，加上無生存个意向，故所生活能力當遽變差，有了印尼移工奉伺，洗湯食飯愛靠佢，看起來幸福，係講分你擔著，你敢愛?

一儕人基本生活能力 ，食飯著衫都愛靠別人，半息無自由，像坐稈仔(坐監牢)樣仔，奉勸會老吂到老个大自家，鍛鍊身體，康健快樂比麼个家財萬貫較要緊。

這禮拜過咧普普仔，教客上工，兩下晝做義工，朝晨暗晡去改菜地，感恩阿芳哥分一袋月鴿仔屎做得攪泥做肥，毋過厥餔娘噭噭噭噭噥噥哢哢，聽咧乜當譴，應仔餔娘人兩句，又當懊惱。有人有是非，是非毋應聲，麼个都無事，無事係好日，日日無煩惱，日日都恁湛。

承蒙大家

恁仔細

P.S.到昨暗晡正知得吾菜廂面頂該頭樹仔係[台灣欒樹]，

跌落菜廂歸地泥个紅芯黃細花，同泥粉、鳥屎共下攪入[化做春泥更護菜]。浪漫加三級!