阿芳心曲

一眨目開學後已邁入第15週了，12/7天光日係[大雪]，12/22[冬至]。又愛換日誌(日曆)了!

毋知係歲數越多，日仔就過了越遽係無，總感覺一日24點鐘無罅用啊！

今晡朝晨出門个時節，行路去坐公車，包尾用走飆正逐著公車，這兜班車輒常愛等過了內湖花市、瑞光路、內科園區了正有位仔好坐，堵好坐吾隔壁个係一位眉清目秀真靚个阿姆，渡等兩姊妹。

我笑等同佢譫哆，正知這兩姊妹既經兩三十歲了，看起來無已登分，有兜仔阿達阿達樣仔，做阿姆个逐日渡佢兜上、下課——博愛學校。阿姆講：「佢兜真乖，佢歡喜上課，佢快樂，我就快樂！」最偉大个天下慈母心，佢總共降有三個妹仔，中間第二個有大學畢業，毋過大二起勢精神方面有兜爭差，圓身也無已砸磳，故所乜無上班，所以佢兩公婆還愛艱辛照顧三姊妹。

每儕人面對自家生命个習題無共樣，我興沖沖仔行入校門，在川堂大廳堵著教務主任，佢同我講，中年級有反應，細人仔毋好我摸厥頭那，摸抑係搉頭那，這差別斯當大哟！

總講，教學過程中，盡量避免肢體碰觸，這滿細人仔降了少、全係寶，千萬做毋得儘採停動著佢个圓身無適當个部位。

學校中庭个豔紫荊(香港櫻花)開到滿棚恁鬧，歸朝晨無閒洎杈嬌惹這兜[媽寶]，因爭校內多語文競賽下禮拜開始了，演講、朗讀个做下恁多問題，嗄無心情好好來欣賞恁靚个花。

臨暗頭，行去河濱花園，銀牡丹、藍蝴蝶也開到真靚，阿賴同我講，厥細心臼降第二胎个妹仔十朝了，在[做月仔中心]，一日八千箍，該30日，就愛花24萬。唉哉！這下降一個子，妹家包30萬紅包，屋下分30萬獎金，實在還值！阿賴講：「人生來就已無公平，有錢人同窮苦人爭差盡多哟！」

講來講去，全係講「錢雖然毋係萬能个，毋過無錢萬萬不能。」