愛擔輸贏//家娘93歲做生日－阿芳心曲

昨晡日在台北跈野虎登山隊去小南港山→白匏湖→白匏湖山主峰→南港茶葉博物館。雖然係遠足遊尞性質，毋過乜愛有兜仔擔耐，無強強就會行毋贏，會拖累隊伍進行喔!

過晝4:13轉到松山車頭，影着扛板頂高LED燈顯示:17:13區間快海線有到彰化个車班。三步捙做兩步，遽遽騎U-bike轉屋下，煞煞洗身，連寸下來个衫褲無加洗淨，轉頭又騎U-bike，倒轉車頭正17:03定定。阿彌陀佛!雖然緊性較會出差做毋著，毋過專心一意事竟成。歡喜啊!暗晡7:36安全到通霄車頭。

老家娘接眼看着笑笑仔，無看出具有爭差。落尾睡目前，吾老公正講10/27(三)佢去蹶馬崙山時節，家娘在屋下練習行路時，外勞無在旁脣掌等，佢嗄跌着咧!當日無喊痛，過了一日就呻肩頭痛、屎胐痛，高不將老周買止痛藥分佢食。

今晡朝晨扶佢hong床後，佢交代:愛包一隻紅包分外勞，佢無在幾久日仔咧!初下碼聽着，恅着外勞愛離開了愛送達謝禮分佢，吂知佢係講佢自家[不久於人世了]，還交代愛著麼个衫，害我有一息仔心酸，揇等佢親像細人仔樣安慰拍拍佢背囊。毋過講轉來恁樣無品質个生活，係換做我，我乜無愛。下背:係我上星期寫分【文學客家】雜誌文章个一段:

會請印尼嫲最主要係𠊎這心臼毋擔輸贏，無想愛戴家娘身邊侍候三餐同洗湯。

倈仔妹仔無增志吂結婚，𠊎無孫仔好渡，照家娘个思想，當然𠊎兩公婆就愛轉老屋照顧老人家，吾小郎叔有一對孫仔，大孫既經讀國小一年生咧，當然小郎叔姆渡孫第一大重要，做得毋使插家官家娘任何事。

平平吾家娘生養五個－－兩男三女，做麼个就淨𠊎一儕識同佢洗過身定定，其他三個妹仔同細心臼從頭到尾毋識摸過抑看過家娘跎到腰仔下來个老乳脯呢?哈!恁榮幸个任務就𠊎正有福享受得着啊!

記得頭一擺看着厥老乳菇心肝著一下驚，嗄大聲笑出來，佢講:你吂到老，等你老咧乜共樣啊!到這下，見怪也毋怪奇咧!顛倒看佢歸身皮包骨，皮薄到略略仔較大力寸一下就會溜皮著傷，故所愛輕手輕腳同佢沖一下就好。洗身水乜做毋得忒燒，水忒燒皮膚就會癢，忒冷又驚寒着，寒天愛燒氣爐脣口呵等。

上禮拜日正同家娘做93歲个生日。在苑裡龍園餐廳食晝: