這係四年前个紀錄。
原來阿姨既經過身四年齡咧!
吾家官乜過身兩年半咧，家娘日見日、年視年老化，身體也無恁華麗，精神乜無恁精靈。這下人生必經个過程，高不將愛接受啊。
我自家就年視年頭那毛蓬白咧!
昨暗晡正同客家筆會編輯群見面討論，老咧愛認老，交分後生个接手正著。
捷運南京松江站7號出口 16/11/09晚6:30~9:00怡客咖啡店
客家筆會首次召開編輯會議 由左老師作東
*************************************************************************************************
2012-11-04有感
昨晡下晝去羅斯福路參加客家筆會下晝茶，
主題係討論筆名江若琳(蘭軒)个羅秀玲老師个詩文集
《相思 落一地泥》。
有三十空儕參加，黃金讀書會長劉楨渡三個恁靚个妹仔、倈仔來，第一時間接目我嗄記毋起係佢，因爭在板橋黃金咖啡館暗黃个電火下，看著个劉楨正經息把仔無共樣，毋過，佢除了公務員身分，放尞日還愛主持廣播，實在係千手觀音，這就係客家婦人家个堅耐。還有好友先生楊寶蓮博士，渡大五個大細，老師退休了，還讀出博士學位。這兜客家優秀婦人家就係enˊ个榮光！
我一溜麵線就無知好收束。講轉這三隻月正舉辦一擺个[文學下晝茶]正經當好啉limˊ。毋過，最好事前先讀一下討論个書目，主講者通棚就係作者，可比係刻佛人；讀者就係相佛人，大家坐下來共下做真誠个雙向交流，係一種難得共同學習摎成長个機會，三個月正輪一擺，能不珍惜無？
今晡日我花忒歸日个時間，同昨晡下晝座談記錄大體整理，感覺自家收穫淰淰盡多恁多。
雖然吾妹仔歸日喊圓身痠軟痛，胃口毋好想翻ponˊ(嘔吐)，我知佢寒honˇ着doˋ(感冒)咧！煮豬肉卵包湯分佢食，佢乜毋好食；烳puˇ糜moiˇ(熬稀飯)分佢食，乜吞毋落胲(食不下嚥)，看佢歸日軟taiˋtaiˋ仔(軟綿綿有氣無力的)，我也快樂毋起來。
臨暗邊仔(傍晚)，吾老公打電話分我講，頭份大阿姨過身(去世)咧!
我去電話分姨表姊妹，佢倆子妹分別共樣問我：「你哪央時(啥時)轉來？」
「敢愛我ten手(協助)？」我問。
「毋使，做下分喪葬禮儀公司包辦。11/10(六)出山(出殯)。」
大姨生前老年失智，兩年零來，連自家个子孫就毋識了，我前兩個月婉拒表妹个邀請，無去新竹看阿姨。
唉！看抑無看，無要緊，問題係看無看，佢共樣毋會好起來啊！嗚呼哀哉！93歲了，命終有時盡！死係下一個生个開始。
****************************************************************************************************
欣賞葉新老師个傑作:
油彩 畫布 20F
人生際遇有如這瓜藤
時而平順時而崎嶇
心情時而開朗
時而糾結
但日子總是要過
當煩心事有如蔓藤般來攪局
只能想辦法一一剷除
才能邁開步伐往前行
也因勇於征服逆境
才會感覺平順的可貴
祝福好友
平安順心
恁仔細
承蒙你
留言列表
