阿芳心曲

我自家嚇自家，前一駁仔血糖偏高个老問題&肝功能GPT指數高達104，這下有控制下來哩。今晡朝晨一hong床，吾老公就同我測血糖，116係安全範圍，我心肝頭黏時歡喜起來；還有放了寒假三禮拜，歸個身心放輕鬆，感覺[無事一身輕，做人還價值]。

我乜識每日愛在BLOG PO一篇記錄正過願，這滿目珠、身體壞蹄了，正知愛做運動顧性命正係生活底肚最重要个事；係無，親像吾家官，橫在醫院呼吸照護中心，無停無動，愛燒錢銀，正經歪命，我無希望下擺自家係恁樣。

後生時節就愛有自我保健个習慣，無時到老了病痛纏身，該央時自家艱苦又拖累子孫，正經就安到無修。今晡日報紙講，後年開始台灣个老人家人數會超過細人仔，故所這兜老人家愛自重自愛、自立自強。

今年過年，因為重感冒歸身悿歪歪，我正轉通霄屋下歇四暗晡定定，年初三轉妹家食過晝就煞煞上台北，一息就無塞著車，又當順利尋著巷肚个免費停車位，實在好運氣!心肝放定定，哪仔就無去，一出門愛開所費，在屋下關照自家身心做保健，兩公婆相親相惜同妹仔共下享受天倫，恁樣也已滿意。

親愛又尊敬个好朋友:2014新年算過忒了，昨晡日年初五立春落雨，透清明?今晡日公司行號做盡開工上班了。連續兩禮拜好天時，昨晡日落雨了乜當歡喜——吾良師益友之一 後生个阿均頭恁樣講，我十分認同，係無煩勞在心肚，逐日就係好天時。祝福   大自家

立馬發發發