阿芳心曲

戀戀阿滿姐

姑丈餵食巧克力

阿滿姐係吾秋姑个家娘，民國2年出生，過了年98高壽，「高壽不如高興，高興不如快樂，快樂就係幸福」──就係厥一生人个寫照。去年下仔去看佢，記性有一息仔爭差，無麼个識我，毋過，這得人惜个「奶奶」（我跈等吾表弟妹恁樣喊佢），見人就好話胤（一直）講：「阿芳，你恁靚哟!你比頭擺還過靚，你越來越靚！」百歲婆的嘴愛吃巧克力，甜个贏過膏(塗)蜂糖，分佢胤「阿腦(言部)」，心肝肚乜盡暢樂！吾老公就當欣賞厥這點「樂線」(樂觀)个性格，喊我愛學著來。

當年頭份有名个才貌雙全个美人

鶼鰈情深

秋姑大15歲，當時新竹女中畢業，讀實踐家專个細阿妹盡罕得，畢業了後在中學教書，生著靚又聰明伶俐，門檻就會分媒人踏平忒，異多人來講親，3.4年後同三義人士吳照英結公婆，該央時我初中一年，佢兜9/28教師節結婚蜜月旅行了後轉妹家，送我ㄧ隻手錶，吾姑從細仔就盡惜我。

第一擺認識且姆婆曾滿妹，係秋姑降頭胎仔做滿月个時節，跈等大人去三義親家屋下做人客。食晝該下，我盡命牯齕歸肚飽，因爭無識食著恁多奇考个食齣，厥雞酒有放當歸、牛眼乾、枸杞子，味緒摎阿婆煮个無相同；爌肉乜有摎糖……

後背（1.2年後佢兜遷徙到北苗嘉盛），每寒、暑假放尞時，吾姑就喊我去手渡細人仔，歇在厥新起兩層有庭院个洋樓，同親家公、且姆婆共下，學習著厥溫悠高尚个生活方式。佢同秋姑兩姐家娘共樣係理家个慶腳，屋內、屋背做盡打理著一塵不染盡舒爽淨例。且姆婆後生時節，識摎日本人做管家，佢靈巧肯學，學著日本家庭主婦个持家本事。

降嬰兒仔時節，佢做一領日本和服式个「貝比服牯」(嬰兒抱毯）同我「送庚」（頭胎做月送禮），後背借吾老弟心臼，叮嚀用了愛還，結果一去無見忒咧！害我久久不能忘。

吾姆渡吾妹仔  吾妹仔轉著个嬰兒衫就係阿滿姐做个