上禮拜五,打早欣賞了學生仔精彩个[母語笑詼],接等上課特別有精神。
第一節一年生个阿媛妹仔同我分享,佢[有獎徵答]得到一支原子筆獎品。
還慶哟!
第二節,恩上到{童玩}單元,我渡阿靖同阿潔去樓下中庭摘[布咕酸](酢漿草)做一個細細仔个[雞毛錢仔](毽子),係一個草雞毛錢仔。
佢兩儕毋會踢,用手拍到恁歡喜。
兩儕搞到歡喜靂天。
我想起國小六年生活裡肚最相好個个朋友,黃秀玲。
一年到六年,佢在吾班項做盡打頭名,年年做班長&模範生。
佢比我大半歲,明顯知人我又聽話認真,係先生&同學心肚公認个好學生仔。包尾佢考頭份初中打頭名,係該屆女狀元,男狀元係 吳元珪校長。
這滿,佢係一位經濟學博士,同老公歸家歇在米國矽谷,嗄失聯了。
老了,當會愐想頭擺个點點滴滴。
第三節,三年生个上[十二生肖],乜師生盡歡喜。
兩儕一組上來演練,有板有眼,細人仔潛力當多。
看影片,佢兜最好!
我正想:今晡日實在還快樂,心情當暢;吂知第四節有一個搞怪个細阿妹仔上一堂[自然]課,同厥自然先生起衝突,導師喊佢去尋先生[講清楚、說明白],一去,大半節無轉來,另外同學通盤講,愛去尋佢轉來,驚佢有麼个差錯~~~~正經係[皇帝不急,急死太監]。故所,秩序有兜仔爭差,當然會影響吾心情。
毋過,唱了客語版童謠【三輪車】:
三輪車,走得遽,
頂高坐個老阿婆。
愛五角,分一箍,
你講奇怪毋奇怪?
各位好友:您看恁樣快樂个過日子,仰毋會特珍惜把握呢?
恁仔細
承蒙你
文章標籤
全站熱搜
留言列表