阿燿哥翕个
朝晨阿桂貞本本在公園做了達摩易筋功體操，七點鐘邊仔堵著頭擺熟事个一位阿滿姊，佢同𠊎講，另一位柳阿姊係屏東个[香蕉公主]，這兩日下南轉屋下收租，阿爸留下來个弓蕉園贌piog(租)分人種大金剛面霧-----還有糖尿病人做得食个呢。桂貞同佢共下行去基隆河左岸五號水門行入斡往左手片行，立冬前兩日个拜六，朝晨頭个日頭還當烈，歸路就聽佢講講厥个80歲一路里來个故事。
阿滿姊江西九江莊下人，厥爸做兵跈等老蔣到廣東，阿滿在廣東出世，面頂有三個阿姊，佢座第四，下背有兩個老弟，連厥公、厥婆全家靠厥爸月給生活。對金門戴過，搬過來台灣歇在台中成功嶺，厥爸做開發成功嶺新兵訓練中心个司令長，正開始時節生活苦煎煎，佢六、七歲樣仔識做乞食，同人討分阿公、阿婆食。厥爸愛畜一家大細同步隊阿兵哥，奉陳誠命令，用厥爸名仔大量買田買地，結果幾十年後佢兄弟姊妹全繼承厥爸名下个田地，變做有錢人咧。厥爸官拜中將退休，90歲正消忒，係還在有百過十零歲咧。
阿滿姊滿女嬌尸撥撥，從細無膽又好噭；大咧嫁分大佢10歲个山東阿兵牯外語能力相當好，本成想愛做外交官，包尾官拜陸軍聯勤採購部少將退休，因為同孫道存阿爸係好朋友關係，三千多萬貯金全部擲去投資太平洋電纜股票，結果輸淨淨，正經譴到死忒，8年前83歲壽終正寢，2008年馬英九總統親臨悼唁，阿滿姊到今還認為係無上光榮，佢講厥好朋友楊太太老公比厥老公先兩年消忒，阿扁總統來獻花致意，無佢恁幸運，有緣投桑馬總統來啊，哈哈!!
阿滿姊講厥大心臼盡不孝，厥老公過身後，半隻个月退俸一年40萬，做下分大心臼領去用，還毋知足，歇厥四樓公寓，佢分心臼、孫女逐到樓頂加起个屋仔自家戴自家煮自家食。雖然在挹翠山莊還有別莊租人有屋稅22000好拿，這屋仔係妹家老弟分佢錢買个，做厥名，乜識分大倈仔心臼戴過；大倈仔買屋在桃園內壢大廈，租金收入正9000定定。第二個徠仔討台南奇美醫院副院長个妹仔，戴美國。
滿子个大倈仔舊年考入台大醫科，細个倈仔正小學二年生8歲定定，中央有過一對雙包卵妹仔，同電視主持人吳淡如共樣診所共隻名醫[植入胚胎做人]，又共日降个，毋過一個大頭症，一個胎死腹中，先生建議愛爽忒，毋好降giung(生)下來正毋會燒錢，親像吳淡如強強愛降下妹仔來，賺个錢毋罅分佢開。厥倈仔跪下來哀求先生，心臼毋肯去[墮胎]，兩個大伯共下扛細心臼去診所打忒，好得無保留降下來，事實證明較多江山乜毋罅這無正常个細人仔燒錢。背尾過兩年正又降咧一個倈仔，嗄無妹仔咧。阿滿姊本身降四個倈仔無妹仔，總下有8個孫仔，算係子孫滿堂咧哩。
阿滿姊肖虎，佢講自家討心臼个時節，新娘入門佢就自重避無見面，等定疊正出來招呼親友，故所桂貞喊佢「將門虎女」。佢後生時節識在汽車公司做業務賣車仔，平均一日推銷一輛車仔，該央時佢開一輛英國迷你奧斯汀細車仔，在社區捩來捩去當風神。佢係一位樂線伯姆，敬祝佢
食百二歲
行路有風
阿滿姊(右)同張秋子阿姊朝晨散步在新東公園。
阿燿哥翕个
恁仔細
承蒙你
留言列表
