阿芳心曲

1988年外婆90歲生日  女兒、媳婦大集合

站立者由左至右:二姨、我媽、小姨；姨婆(外婆唯一小妹)、大舅媽、大姨、三舅媽

只剩小阿姨還健在

小阿姨&阿芳

小阿姨的太陽眼鏡是45年前跟小舅以150元購得的，使用到今

一雙推動搖籃的美麗的手

菡萏香銷翠葉殘，西風愁起碧波間。

還與容光共憔悴，不堪看。

南唐中主李璟詞，大有「眾芳蕪穢，美人遲暮」之感。(人間詞話卷上)

2012-11-10(六)打早同細阿姨共赴大阿姨靈前，共下坐車去。

這朱家四蕊靚靚个姊妹花底肚，三儕都「蕪穢」了，單淨伸著佢一儕「美人遲暮」。

細阿姨大我十五歲，二十歲就憑媒妁之言分姐公主意，嫁分竹東姓溫人——歸屋下紳士文明人，就排行老二吾姨丈後生時較無傪cam人(較不成器)，又會打餔娘。細姨逆來順受、委屈隱忍，靠無師自通个裁縫技術在竹東市場脣經營一間布店，蓄大三個倈仔。

這下大倈仔&姨丈既經過身了，其他兩個倈子摎三個心臼做下另外戴，佢一儕人清心寡慾，做一個[獨居老人]。每日燒香念佛、拜阿公婆，深居簡出，盡注重養生。聽佢講佢每日洗身，愛拍打全身、活絡筋骨，一盆身愛花點過零鐘來洗，故所到今七十零歲了，皮膚還白淨幼嫩，看起來比我較後生。

(有一位歇珊珠湖个細倈老師係阿姨个同學，歸生人摎阿姨个相片放在細皮夾仔內片，二、三年姨丈消忒時節，佢識打電話分阿姨，阿姨同佢講:「你係有餔娘个人，我無可能同你交往」。恁樣了，麼个漦事就無咧!)

當晝共桌食晝該下，細姨當眾宣布一個吾姆个秘密：(還講吾姆生前有吩咐佢，莫講出來；這下，佢認為講出來分子孫明白，無相干。)

吾姆二十四歲行嫁前，同斗煥坪一個姓張个師傅學洋裁四隻月，這細妹師傅个老弟一表人才，吾姆有合意，毋過「父命難違」，包尾同這張先生係一場「無言个結局」；這位開中藥店个先生乜歸生人無結婚。後背吾爸過身忒，有一位新竹个眼科先生乜想愛同吾姆交往，吾姆講分吾細老弟阻擋，「奇怪咧！我全吾半滴仔印象！」共桌个細老弟恁仔講，吾爸過身該年，佢正十歲。

親像這兜「羅生門」有个無个事情，係講當事者還健在，就做得問清楚講明白。這下，一抹煞聽過就算咧，乜毋使問到一支柄來擎。

奉勸世間有爺有哀个倈仔妹仔，多多同父母譫哆，家庭「口述歷史」就對這開始哟。