阿芳心曲

資訊科技日新月異，電腦、iphone、ipad、超級電腦……我是文盲，在這區塊。

客家筆會靚妹仔臭屁貞，佢同我有一息仔[擦身而過]个師生因緣，這下在這方面，佢分我當多偎靠。「毋使驚！鍵盤毋會食你，就分佢大力按下去！」

正經愛「能役於科技，嗄毋科技所趨使」，正做得充分享受現代文明所帶來豐富生命个資源。

我雖然係戇嗲烏龜同機伶兔仔走相逐，毋過，我無飆過他人个野心，我同自家交代，日仔過仔去就好。

參加客家社團、讀書會，為著頭腦愛有刺激；加入登山隊社，為著身體愛康健；成時同宗教成長團體共修，尋著心情定疊个方式；當然，家人、手足、親戚、朋友(格友)个互動，還係維護生命个動力。

拜五下晝，我同銀銀做短暫个三、四點鐘个約會，背囊背等重鈂鈂个包袱，打算暗晡夜[客家話拼音班]下課忒，續等[國光號]轉頭份。

銀銀堂子渡我轉木柵景文學校，見著數學王先生……物理郭先生同我講，所有老師上班時間係8:00~17:10，絕對無專任[無課做得早退]个自由了，呵！時代在進步，食頭路兜人飯碗斯較無簡單哩！

兩儕簡單食咧自助餐暗餐，佢就送我上公車。下班、下課期間，幾下輛公車無尖上，我坐660到景美捷運站轉淡水線，身心蓋悿，就打手機同拼音班細班長臭皮貞請假，直接到咧台北火車頭巴士轉運站，買著國光號[補位]車單，等咧四十分鐘正坐上七點發个車枋，吂八點半就到咧頭份車頭。

吾老公對通霄來相接，轉到珊珠湖，啉哩兩杯茶，又有精神咧！繼續去大姨屋下同表姊妹「弔唁」——天光日吾大姨就愛出山了！雖然吾無瞻仰著遺容，厥端莊典雅个慈顏，一生人長留著吾心肝肚。

這暗晡，在阿姆个紅眠床頂，貶來轉去難睡落覺！

阿姐婆、阿姨、阿姆……歸頭那捩捩轉。。。。。。