阿芳心曲

佢年零無電毛咧!今晡下晝好恬恬仔同厥老公問:

「𠊎愛去電毛，你講好無?」

「好啊!」老公挑事恁樣頂碓，佢知厥姐仔愛同佢顛倒反，喊佢行東片，定著往西片去。吂知佢當決截旋風就去[人人美容院]尋老師傅電毛。老師傅從細就對新竹新埔上來學手藝，開這坎店乜有40零年咧。佢同師傅兩公婆已熟事，年半前師傅个單丁子結了婚，到今吂降，雖然兩個大个妹仔分佢做四面姐公、姐婆咧!

厥倈仔下來个滿女，上駁仔交一隻基督教會認識个男朋友，足足細厥妹仔一輪12歲，兩老仔面都竵feˋ到該片去，愁乜無用，兩個大个妹仔話佢兩老仔講，順其自然反對無效，到這下交往順序，就愁細倈仔頭路吂定疊。老師傅又同佢談哆講:

有一個細妹主顧係退休先生，每隻月領18%經濟無問題，老公死忒也留了幾千萬存款同一間七八千萬大坪數的大廈屋仔，分兩子哀共下戴，倈仔帶一個細妹仔共下同哀仔[同居]，過了兩年零，哀仔催後生兩儕結婚好分佢做阿婆。講好三儕渡等去買新房家具，哀仔中意紅色个，細妹仔合意白色个，包尾全順細妹仔意，買咧白色系列，毋過就伸一隻垃圾桶愛紅色个。吂知轉到屋下，細妹仔同厥倈仔講:

「若姆百項愛管，𠊎堵毋著，無法度同你共下行下去咧。」厥母讓步講另外買一間套房搬出去戴，這屋仔分後生人歇，也做毋得救轉這婚事咧，就恁樣兩儕平和分手，後背細妹仔嫁分別人咧。這倈仔閼厥姆好多年，還放話分阿姆:

「吾个婚姻，你莫插!」當然做阿姆儕麼个就放佢去，做閒人正得。恁樣又過咧好多年，忽然間倈仔同佢講:

「𠊎愛結婚咧!」細妹仔還有身項咧!買一送一，皆大歡喜。

故所，教精大自家:兒孫自有兒孫福，莫為兒孫做馬牛。

佢花兩點零鐘洗頭那毛同[熱電]頭那毛，開了700個銀定定。轉到屋下厥老公阿𧩣：「真靚!」有價值。