close
今晡日氣象報告講麼个「低溫特報」,嘉義地區朝晨打早正5.6度低溫;還講昨晡日在玉山排雲山莊零下11度,有一個27歲个氣象員,冷到腦溢血,經直升機送嘉義基督教醫院急救,已經無生命危險咧!
可能ngaiˇ大箍,皮囊油質較賁,故所較毋驚寒、毋驚冷。朝晨ngaiˇ單淨著一領長袖个排汗衫加一領袷仔就出門,行等路根本毋會冷。
過晝邊仔,去泅水。 管理 小姐問:「無燒水,你敢還愛泅?」有22度个水溫,泅起來盡舒爽,因為冷咻咻無麼个人來,一儕享受一隻水道,真經暢樂!
下晝4點到6點去練唱,天光日恩兜合唱團受邀愛去彰化花壇演唱。這星期二暗晡練習時,指揮 黃 先生愁到當愁,引講:「歌譜背毋起,帶譜上台,看等譜唱,較保險!」毋過,今晡下晝情況改善異多,先生心頭个大石牯敢有放下來咧?憑良心講,平常時練習,大家無盡認真,輒常輪等缺席毋來。
在這ngaiˇ乜愛檢討:這期學習無全勤。 黃 先生性體特好,從來無識看佢發脾氣,同學也愛知愛,正毋會辜負先生个指導,同浪費自己摎大自家个時間,親愛个頌愛好朋友,你講係毋係呢?
全站熱搜
留言列表