阿芳心曲

昨晡下晝ngaiˇ就轉通霄，兩禮拜無看到老人家，也會心憔。

雖然氣象報告講:天時變寒，毋過今晡日歸日出日頭，感覺有一息仔清冷清冷，也無講當寒。兩老仔平平和和仔，感謝天公!

尤其吾个家倌本成愛厥倈仔(吾老公)同佢洗身，這站仔毋使咧，故所ngaiˇ兩公婆感覺較輕鬆。吾个家娘從今年3月開始大病一場，足足看先生食藥仔9隻月恁久，再加2.3日，佢就毋使食藥仔咧!感謝神明保佑!

朝晨，吾家娘已經去市場一輪哎，聽ngaiˇ想食無洩農藥个蕃薯，佢又盯盯(專程)帶ngaiˇ去買。該賣蕃薯个阿伯，係吾家倌做兵時節个同袍，身體還異咂磳，佢還問候吾家倌身體華麗無，因爭10:30過咧，生意抑無好，大條个分人擇淨淨，剩到小條个蕃薯，佢算1斤8個銀，打早一斤賣10箍。當大紥个蔥仔，一紥正10個銀，吾家娘出佢3紥20箍，佢也講好，包尾剩4紥，吾家娘出價25， ngaiˇ拿30分佢。隔壁賣菜个歐巴桑拿歸大包(感怕有2斤還加)个吊菜仔分吾家娘，「10箍就好」，還有兩紥調羹白，一紥5塊錢，2紥10塊。

嫩皙皙仔个芥蘭菜一斤正10個銀，賣菜个阿桑講，毋識恁便宜過，割價就愛15箍，今晡日實在無生意!感怕係天時寒，大家糾在屋下，無愛出門个關係。正轉到屋下，隔壁个阿寶嬸喊ngaiˇ同佢去買3斤，因為該係厥个親戚，佢敗勢去買，ngaiˇ騎自行車去總貌，一抹煞捎來3斤空仔34個銀。感謝這兜種菜个鄉親!

吾家娘買了一大隻番鴨公，剁好分做3包，佢一份煮好「薑嫲鴨」，喊ngaiˇ食。另外2份，吾同小郎叔姆，一儕一份，連薑嫲就切便便，交代轉台北正煮分大細食。感恩阿公婆保庇全家平安!感謝吾家娘!

～承蒙你恁有耐心看忒這篇文章!恁仔細!正來尞!～