阿芳心曲

2010/11/24（三）

朝晨，去台大醫院教學技能中心做志工

一晝邊就恁樣過去，轉到屋下已經下晝點過零鐘

吾老公胚想ngaiˇ毋會轉來食晝，故所無開火灶煮飯

害ngaiˇ忍等肚笥飢燙青菜煮魚、豆腐摎米醬湯

結果該碗公魚湯分佢嫌臭臊

害ngaiˇ自家盡命牯齕兩餐還吂食忒

下晝，兩點到四點睡當晝

等到成德國小客語班二年生阿奕誠个阿姆來電話，正hong床

實在異好命！

原來

這隻學生仔毋係客家子弟，嗄當有趣味參加客語比賽

寶島客語廣播電台於12/18舉行

「99年  大鵬盃  客家諺語及客家流行歌曲歌詞朗誦比賽」

愛拜託ngaiˇ ten手指導

敢做得講「ngaiˇ毋曉」?

煩惱事數一千擔，拂就拂毋忒

愛央結煞正好？泅水去較好！

續等40分鐘去游泳池泅水，一泅解千愁！

暗晡夜，

妹仔有孝放一片DVD＜名牌冤家＞

休葛蘭同沙拉潔西卡派克主演个

對話像旁白，從頭開始看毋識，

忍等看到啄目睡，足足會1點鐘正煞

也忒憨痴(hamˊ ceˊ)！

這中間，

ngaiˇ接著一通市議員候選人个錄音拜票

對等錄音ngaiˇ回答講

「知……好…….好，祝你高票當選」

在唇頭个妹仔同老公笑吾憨痴

三儕大聲笑到肚笥痛