阿芳心曲

這係上禮拜到立農國小客家文化服務个志工團

今晡日吂到8:00 ngaiˇ就出門，

本本行基隆河左岸，煞力行到錫口碼頭，蹶上彩虹橋頂項，

一路問人，行到南港路摎玉成街交接處，

問一個後生細妹仔「玉成國小在奈位？」

「噢！還異遠，愛行盡久，你最好坐公車。」

坐上306公車，汗吂擦燥，正過3站就到咧哩！

由此可見，ngaiˇ同後生該輩人，當多觀念無法度有「共識」──

厥認為「當遠，愛坐車」；ngaiˇ个想法係：

「異近，行路做運動」。

行過向陽路學校大門，

吾搭檔 彭瑞琴 老師既經企在該等等。

兩禮拜無見面，雖然正第二擺共下，乜親膩膩仔！

前次拜四，歸日兩場──西湖國小&立農國小。

北市客委會因應花博即將開幕，

委請威利傳播公司策劃

【2010花啦嗶剝】客家日闖關活動。

99年客家文化到校服務，聽講係延續舊年个

「客家文化推廣摎傳承」个工作。

歸隻教學計畫摎教案設計係  張淑玲先生總策劃各，當湛斗!

彭瑞琴老師同ngaiˇ負責第一關──花啦嗶「博」

一關10分鐘邊仔，感覺今晡朝晨時間較鬆，場地較闊，

細人仔也十分乖，規矩盡好。

4年生，全年級5班，一班正20空儕學生仔，

「少子化」實在大嚴重！