close
中秋節午後,日頭當烈,天異青,雲盡白
涼風習習个露臺,賓主相談當歡喜
臨暗仔在新光摩天大樓觀景台遠眺101大樓,左上方白白圓圓个係2010年八月半个月光
2010/9/22
ngaiˇ同妹仔共下去林口細老弟屋下過八月半。
11點邊仔到厥15樓屋下,
吾老弟兩公婆無閒洎杈在灶下、外背踏出踏入。
ngaiˇ吂食朝,
毋管橫抑直,拿等碗就先食咧!
吾妹仔講:「阿舅實在還厲害,連鹽酥雞也做得DIY。」
佢摎切到細堐个「豬紅蒸糯米」(豬血糕)抹兜瓦沙咪醬,用油炸到酥酥酥,
還有豆腐干、黑輪共樣炸到外酥內軟,大人細子就食到尋味。
等頭份大老弟兩公婆來到,大包細包像搬屋樣仔拿一千擔好食吂好食个東西。
這種「有東西同自家人分享」个慣俗原旦就恁樣,
尤其,哀仔還在个時節,差毋多逐隻月,
四姊妹就會在頭份大老弟屋下會面,輒常提供好食个點心、零嗒這兜有个無个。
每逢佳節倍思親,無爺無哀个特別會心酸。
今晡日,台南个二姊無來,「遍插茱萸少一人」!
通了電話,乜共樣意思到咧!
下晝,發哥同馨雲來尞,
暗晡時,ngaiˇ跈去發哥老妹北投个大別墅尞,
天光日,ngaiˇ愛轉通霄團圓。
全站熱搜
留言列表