老弟愛來拜託大家盡量廣告出去，分客家鄉親知這消息，過來（再來）愛拜託大家盡量來報名考試，這擺介機會係盡無簡單正爭取來介，若係講本身係客人介人乜局恬恬（裝沉默），相信下擺愛有這機會也難了，乜會（也會）分其他族群介人看無。
你莫想講盡難，毋會啦！會同大家手（幫忙），辦認證說明會，教大家仰般（如何）來考試，拜託你定著（一定）愛這消息盡量講分大家知，也拜託你定著愛來報名，當做一擺客家大會，共下來打喙古（聊天），乜毋怕，係無？
係用一種恭敬、拜求、懇求、跪求的心情，請你徛出來（站出來），參加這擺介認證考試。
前一駁仔介調查，大體知基隆市有1152儕（位）客家籍子弟在各各國中小學底肚，長期以來基隆市各只學校毋開客家語言教學課程，分嗯介客家子弟直直「福佬化」下去，對恁樣一只嚴肅又分人痛心腸介情形，各位客家人敢做得無聲無息？
大家毋好想講其他族群會分糖仔你食，該係憨想（妄想），你也毋好過想政府會保護客家話，難啊！拜託你遽遽（快點）徛出來。
老弟知各位定著會愁（擔心）、會驚拼音介問題，乜會驚自家講毋標準這兜原因，毋敢來參加認證考試，也毋敢教客家話，其實這係無效介，你無行出來，仰會知你介能力，奈得荷無呢，係毋係？5/20、5/21這兩日，會辦認證說明會來輔導各位參加這擺認證考試，確定時間地點，請參考簡章。
真經（真的）無法度相信各位客家人會看「客家語言」流失失傳，毋插毋聲（不理不睬），更加無法度相信各位身上流等介客家血會流淨淨，打死也難相信客家魂會到若圓身（身上）散淨淨、消淨淨。
麼人（誰）講客家話無字？麼人講客家話寫毋出來？麼人講客家話難學？只不過因為你無了解定。
有人講「母語」在屋下肚（家裡）學就好了，驚到無奈囥（無處躲藏），因為屋肚也不能提供細人仔學習介機會了；學校講「課排毋落」，想問介係做麼「福佬語」就排得落？學校講「無師資」加下，想問介是「敢講嗯俚儕全毋係客 家 先生，嗯俚敢會毋係人，係無？」；學校講客家人沒幾多儕，愛仰般開課加下？我驚著毋知仰葛煞（不只所措），因為續（卻）變做（變成）別人目珠肚介「貓」仔哩；主管教育局講「經費有限」加下，想愛問介係做麼「福佬語」會有經費？有一大堆的問題？？？？，麼儕做得來為講清楚，說分明？
有盡多話想用客家話你講，懇請、拜託你來參加認證考試，簡章在南榮國小該項賣，請打電話：24223038~10，尋賴石華主任，或者24301505~46，尋 謝杰雄 老師。
求你記得客家的祖訓「寧賣祖宗田、莫忘祖宗言；寧賣祖宗坑，莫忘祖宗聲。」。
照教育部介規劃，未來三年以內鄉土語言支援教師會漸漸仔退出學校去，到時鄉土語言教學會轉還（回歸）到現職教師身上，最驚介係這日到來，因為全基隆市會完全福佬化，福佬先生毋會（不會）你教客家話，係毋係（是不是）？若係各位先生無來經過認證及格，就做毋得教鄉土語言客家話，客家話會在基隆市各各學校完全消失忒去，請大家想真兜（想清楚），係無？總講一句愛拜託你去報名，好無？
留言列表
