阿芳心曲

連續兩三日日頭大出熱𤐰𤐰仔，心情鬆爽當樂暢，雖然取消出國遶尞，毋過在屋下附近行行運動乜安然自在快樂像神仙。

拜一該臨晝仔下課轉屋下時節，堵著一群一年生幾下班學生仔在運動坪脣運動搞體適能器材，𠊎童心大發也下場同佢都細人仔共下搞。有一個牙齒蛀忒大半个胖大細倈仔溫和拉等吾个手，同𠊎紹介運動器材个功能同運動方法，還當熱心教𠊎愛仰般進行做動作，這細細个行踏嗄燒暖咧吾歸隻心肝，淰淰个歡喜講毋出來，就恁樣同細人仔搞有半點鐘，有細人仔問𠊎係無係某人个阿婆?哈哈!老面相斯一息就騙毋著人，前一日吾家娘說𠊎講[緊來緊春風、卡少年哟]，該係打屁安狗心个咧哩!

昨晡當晝臨時同事約去食晝，順續上陽明山遶山花。高大个老樹梅花大體開過花咧，當開个無看著兩頭；路脣紅山櫻、水紅寒櫻有一頭半頭開到當鬧，在青天白雲下實在靚，心情好看麼个都靚妮妮仔。

仰德大道苗圃中心【臺北茶花展】1/19(五)天光日起事10日展出，大家有閒做得來去欣賞。

臨暗仔又去基隆河壩脣行一輪，今晡日行咧萬二步以上就功德圓滿咧!郵局上班个應姊湊𠊎共下五月雨季時節去英國自助旅行3禮拜，既經考慮哩兩日咧，佢下班咧再過來吾屋下同𠊎說明，𠊎多謝咧厥个好意，無恁才調哪!單淨兩個同年个歐巴桑共下去歐洲旅行。生活，輕鬆就好，毋使同自家搣到無閒直掣。