對知人我開始,我就跈等吾婆上上下下,五、六歲邊仔還跈
阿公、阿婆睡目,一直到搬出蕃婆莊,戴在二十份為止。
吾婆盡會煮食,頭擺吂時行辦桌、食飯店時節,隔壁鄰舍
無論好事、壞事做下請吾婆[擎鑊鏟],做[總舖師]。
因爭從細耳濡目染,故所對煮食特別有趣味。
等到十空歲,讀初中開始,吾姆出門時節就交代我這做大姊个
愛煮飯。
尤其,讀高中時節,還愛自家早hong床準備飯兜仔。
放尞時,我負責煮飯;細我兩歲个老妹就領洗碗。
這站仔,血糖有較高息仔~~空肚屎150左右,糖化血色素7.1。
我个血糖標準值120以下,再過轉毋去了!?
我恁愛搣食,嗄做毋得大齕,實在還艱耐。
我受吾姆影響,佢講:
[enˊ兩子哀(咱母女倆)共樣肖羊,故所做毋得食羊肉。]
我50歲前,毋食臭腥个羊肉;最近漸漸仔正愛上薄荷醬沾羊排
个西餐。
這滿,排舞隊一個朋友有門路注文著較便宜个羊肉。
我既經買了十過斤,自家食也分享分屋下人同妹家个大細。
羊肉料理,無論清燉抑係紅燒,[去腥]一等重要。
中藥店草果、陳皮(用新鮮、曬乾个柑仔皮最實用),
番茄、黃梨、蘋果......天然果糖,蔥、薑定著愛,大蔥頭
乜當合味。
我還有一個[秘密武器],就係印傭傳授个芫荽仔(香菜種子)&
核桃果仁。
結果,我乜[視羊肉為珍饈美味]。我會愐起頭擺讀過个
[蘇文熟,喫羊肉;蘇文生,嚼菜根。]个話~~~~
元明以後,科舉時代,細講你讀熟三蘇父子个文章,
肯定功名有望;係無,就窮愁潦倒一生人了。
今晡朝晨散步到撫遠公園堵著識共下做河濱花園个楊美眉。
佢分享佢去宜蘭礁溪海脣人家做个一料臘肉,佢講:
[這臘肉有淰淰个海風、日頭&愛],
我拿來炒乜係佢去中國黃山買轉來个細蕊木耳
摎我自家做个酸白菜同qiˊ(新鮮)个大白菜共下一鑊熟。
當晝連同佢分享个魷魚仔一尾,我同新鮮急速冷凍个透抽,
共下[客家小炒],配料係韭菜、蔥、薑、蒜苗、紅蘿蔔、
鮮肉絲、辣椒這兜冰箱有个無个。
[秘密武器]係屏科大醬油&雲林農家自榨烏麻油。
煮菜係一種[福至心靈]个藝術,無麼个撇步,
總愛用一個有情有愛个心態去料理,
人人就做得成為[料理達人]。
恁仔細
承蒙你
P.S.:頂高靚靚靚過花个[牡丹高麗菜]
係在陽明山花卉試驗中心大門口翕个。
留言列表