阿芳心曲

2013-08-08(四)

下晝四點空四分我坐火車轉通霄。

今晡下晝點過兩點鐘邊仔，台北溫度高到攝氏39.3度，我戴帽仔又擎遮仔，還難耐像火爐堆个燒氣，搣到我歸身汗流脈落。台北，熱天，毋係人戴个所在哦！

宕忒兩點四十分久个時間正到屋下，一入門看著大包袱行李箱放門側，我扡著(以為)吾小娘姑愛轉澳洲了，吂知係阿蘭(印傭)提前解約，天光日一打早就愛轉蘇門達臘過印尼新年，順便忙碌女兒婚事，兩個月休假期滿，即使回台，也無再過轉吾屋下了。

還有今晡日88節，吾家官進行氣切手術，恁樣有利日後个治療，較毋會受到感染。

我老公今晡日歸日守在中榮，為著我又載我去台中看加一輪，佢對爺哀个有孝，大家有目看仔著，我自嘆不如。

我在吾家官耳公脣喊佢同佢講：「爸爸節快樂！」佢略略仔目珠皮停動一下，吾老公當大力同佢動手動腳做運動，佢痛到牙研目皺，原來人類對痛覺最敏感啊！

今晡朝晨陪同彩雲阿姑(吾家官个二姊)去看佢，佢毋知知啊毋知厥姊來？

啊！來到這位既經三禮拜了，到這滿正有一息仔進步。尤其，今暗晡，第二个小娘姑兩公婆日日就來探看，分吾老公已多个支持，聽講拜日佢就愛轉澳洲去了，接下來暑假忒，開學了，又無外勞，該愛仰結煞正好？