終於打道回府了!
你的大手牽著我的小掌，我的小掌握住你的大手。
阿布達比機場轉機
童心未泯
銅駱駝
真係莫名其妙!難得失眠睡毋落覺，今暗晡上了眠牀，嗄轉圜
青眼過了點過鐘，高不將擘hong起來，座定敗了!天光日禮拜日，還尞一日，暗睡晝hong本旦就毋係吾慣勢，堵著恁不尷不尬，實在無奈何!
五月節前一日下晝四點半邊仔，正對瑞士轉來台北桃園機場，兩公婆背等重鈂鈂个大隻細隻个包袱歸誇拉，尤其吾老公腰骨前棧仔有增差，這滿背恁過重，我已毋過心!坐中壢客運到中壢火車頭，煞煞過月台先上車後補票，好得這枋18:00開个莒光號慢兩分，也毋已多人，坐第一車廂，直達通霄。這過程足足花忒四點鐘，就以花大錢去瑞士遶尞了，仰毋盼得坐計程車呢？到了通霄車頭，佢還先轉屋下開車來載恁重个包袱。
該暗晡洗衫機洗了兩桶衫，半夜打風馳落大雨，還同陽台晾个衫收入樓頂項。
第二日，宕睡到會九點正hong，敗勢!吾家娘忍等腰骨痛，既經摎拜阿公婆个[煮碗]通盤料理好了!擔名講愛轉來ten手，結果趕轉去領食。這下个心臼，像我這款當毋湛事!愛講乜係分吾家娘寵上天个哟!
五月節第二朝晨打早上台北，吾老公駛車，我矻事仔睡。拜四、拜五共樣暗時精神足，拜六朝晨，睡到會十點正hong牀，下晝去天母德行東路參加讀書會了，臨暗仔食飽夜，坐著肨凳啄目睡足足兩點鐘，當然這下又反躁睡毋落覺啊!
哦!還有盡大个問題，吾運動停跎下來了!緊緊恢復正常作息正著。
拜四个朝晨吾老公正同我共下上台北來，該當晝就分光田醫院洗腎中心護理部通知，講吾家官血壓有較降、血色素無罅，愛入院檢查，故所佢又拚倒轉去。
唉!做人倈子，無好推懶!毋過，佢吩咐我留在台北，拜五毋使轉通霄去，也可能恁樣我心情無安生……
噯！睡毋落覺就睡毋落覺，何麼死苦牽拖一千擔？多謝你聽我譫哆 敬祝
一夜好眠到天光
留言列表
