close
學老人喊佢【九層塔】;
客家人講【七qidˋ層cenˇ塔tabˋ】、【七qidˋ層cenˇ插cabˋ】,也係【七緣ienˇ插】。
佢个名係從花來安个。
一層一層長長个花串,
有三、四層个,也有七、八、九、十層个。
上圖最長个串花有十層,
這下圖个四層定定。
有青梗&紅梗兩種,
詳細來看,厥花淡淡个吊菜水紅色,乜真靚!
無意中,在校園花壇肚看著,青油油个嫩葉仔當餳人食。
毋過,我毋敢停動摘下來,這係學校公眾个。
煮湯,幾皮浸青个七層插放落去,增加香味,
尤其冬瓜薑絲鴨仔湯;
無就切幼幼个,放在豆油碟肚,搵雞肉、鵝肉.....盡合味。
這係【客家个味緒】,
學老人無定著共樣會接受。
本土母語創作名家 江昀老師文章肚識提著:
厥學老家官無同意倈仔討客家心臼,當鄙視心臼。
心臼烳豬肉粥去分入(醫)院个家官食,只因放兜七層塔菣香,
就觸著厥老腰仔,
放勢捉客家心臼來罵。
好得 師丈惜餔娘,分江先生支持摎安慰,
先生正戴仔下去;
換做我,半夜就兩腳車等走,
受毋下這屙糟氣。
全站熱搜
留言列表