目眨眨仔看等吾老公轉去通霄
無跈佢轉去
馬上就過年咧
毋論臺北、通霄个屋下做盡需要拚掃
平常時無人客來坐尞
狗竇罔狗竇乜異燒暖
無多需要愛大動作總拚掃
過年嘛正一日定定
一眨目就過忒咧哩
垃圾痾糟全由自家主觀个愐法
毋使忒淨俐較好過日仔
你講係毋係啊?!
懶尸阿妹好託懶
愛做你就做
毋做人敢愛同人休忒?
故所
像吾老公講个
「你最大 愛仰般做 你講个算」!
故所
雖然今晡下晝無跈轉去做好心臼
心肝肚自然[知進退]、[知人我]
下禮拜轉屋下就愛煞煞尋頭路來做
上星期轉通霄過新曆年
聽講一則[鄉野傳聞]
這下做[廣播電台]講分你聽:
有一位70歲个歐吉桑
新曆年前兩日
忽然間下晝出門
到暗無轉屋
屋下人總動員
包尾厥細老弟在通霄灣一間蓄蝦場廢用个反鎖个鐵皮屋
[衣衫不整]直直橫在眠床頂
鞋襪脫在眠床下
一領襖袍準被骨龕在肚屎面
人既經消忒咧哩
警察調出歐吉桑手機最近三通電話
係打分附近某社區戴个40零歲个中國新娘
有人過晝12點零還看著佢兩儕行共下
到底這歐吉桑係像厥小郎叔姆同講該
係「暢死」个無?
歐吉桑平常時
識同厥朋友喋大話
講佢交女朋友个事
這[最佳損友]恁樣無保留朋友个顏面
嗄通盤瀉出這澇潰事來
敢做得?
我講完咧
承蒙大家
恁仔細
正來尞
全站熱搜
留言列表