阿芳心曲

昨晡日好天時，正一日好光景；今晡日雖然溫度無爭差，毋過雨毛轟(pang)天，感覺也清冷。

昨晡朝晨，ngaiˇ行路當「暖身」去通霄鎮立游泳池泅水，心肝想：大半隻月寒著無停動，就會變大豬嫲一條咧，愛康健，就愛煞猛運動。泅水旦係吾个最愛，故所愛把握時間——朝晨6:00~9:00；下晝4:30~8:30。

去到該位，正知大堀水池無燒水，一個後生細倈條仔自由自在在該水道泅，看到ngaiˇ在細堀燒水池「打水」當運動，佢停下來同ngaiˇ講「水溫只有15度，好冷！」(華語)當時室外溫度11度，後背ngaiˇ也跳入大堀水，唉哉！阿姆哀个硈硈惇，全身像枝仔冰涮著麻痹麻痺，25公尺煞煞蝶式泅過去，遽遽轉頭水道走轉來，跳入溫水SPA窟，正死心摎全部設施搞一遍，蒸氣室焙焙仔正過願，淋浴間个燒水會死會死仔細細管。毋過，嫌罔嫌，至少ngaiˇ有運動到，心情也暢。

該隻後生細倈條仔原來係南庄客家鄉親，40大零歲，看起來身體異咂磳，在台電通霄火力發電廠上班。遇鄉親，第一暢！

續等去光田醫院通霄分院檢查血糖，李炳賢院長看了吾个病例，舊年三月起，每三個月就檢查一擺。佢講：「毋使自家嚇自家，一年檢一擺就做得。」還毋使掛號費。還算康健，第二暢！

包尾行轉屋下半點鐘邊仔又發現一雙吾妹家阿姆留下來个呢符籙遠紅外線健康半統襪無見咧!騎自行車轉醫院尋著哩！東西跌忒又尋著，第三暢！