阿芳心曲

今晡朝晨，煮好朝去通霄鎮立游泳池泅水。

轉來時節，在屋簷下騎樓，堵到隔壁

阿寶嬸同大倈仔、二心臼、細孫仔在坐涼，

厥心臼著等像大肚衫樣仔，我賭瞵造化問佢:

幾多隻月咧?

因爭食厥喜酒也二、三年咧，問也問到懶頭咧。

無愐著佢嗄回答:

差無多四個零月咧!

[帶把个?]我當歡喜。

[有一個看仔出，還有一個看吂恁清楚。]

[哇哩咧!雙胞卵，我同騰渡一個。]儘彩講，無負責!

阿寶嬸遽遽接等講:[大家有聽著，阿芳愛騰手渡。]

害我顛倒敗勢，改嘴講:[我騰手搞啦!]

[毋使，雞婆......]阿寶嬸笑等講。

換我尋厥細孫仔搞咧!

[王希文，說我愛你!]

兩、三歲子牙牙學語時，口齒不清講:

[......愛你，......]笑到噶噶噶，實在得人惜!

想著格友千帆心心念念全係生著盡像佢个孫女。

含飴弄孫个美好心情，古今中外全部共樣啊!

時下，台灣後生人，結婚意願降低不少，

結婚後，也無肯降仔，原因大自家當明白。

結婚毋係兩儕人情投意合就美滿，背後雙方个原生家庭背景乜異重要。

結婚毋係兒童涽家旯仔，一旦生米煮成飯，後悔也赴毋掣咧!

吾倈仔已早就交有女朋友，毋過既經過十空年咧也吂開花結子；

吾妹仔到這下也緣分吂到，毋識交過男朋友，

係講愛做阿婆，可能等到頭林毛全白乜等毋著唷!

這種事情本成就同我無關係，

細人仔蓄大咧，佢愛結婚抑無愛結婚，

結婚了，愛降子抑無愛降，

我做毋了主唷!

後生人自有自家个主張，

輪毋到做爺哀个為佢傷腦筋，係麼?

輒常看著朋友渡孫仔，心肝肚盡歆羨。

戇狗想囓豬肝骨!任想也白想。

到目前，連一隻魂影就無。

毋知還愛等到哪央時正做得著阿婆咧?

教精恩大自家:

兒孫自有兒孫福。

總有一日我會做阿婆!