阿芳心曲

客語中高級認證通過咧

今晡朝晨日頭恁烈，係洗被單、曬被骨介好時機，無較煞手緊板兜仔，一過晝日頭就落山咧！當無閑介時節，季珊來電，今晡日放榜，客委會吂公告，厥當緊張。「有著、無著，無相干。」我講風涼話。季珊講，有考，當然希望愛考著，無你考來做麼介，「著！我心肝肚乜希望有著。」

點過鐘過後，金德大哥來電通知，吾兩儕就金榜有名。

哈！二、三隻月苦讀，總係有成就，感謝自家介煞猛，吳美 成 先生介勉勵，還有「北市客語教師協會」理事長張宏泰暨諸多指導先生，「彩鳳文化協會」溫源衡會長及 諸多 先生指導，共下學習介同學也盡感謝。我相信錄取率100％，因為考前模擬一抹煞練習過咧！

我從細講客，毋過，讀書過程全全無講、也無會寫。這央時，略略仔「重拾記憶」，「寫」摎「作」有困難；「聽」、「說」、「讀」較無問題，問題在吾細人連聽就聽無識，這乜愛怪我這做哀仔介無知識，該央時細人還細時，吾老公(佢係學老人)喊我教細人講客話，我嫌麻煩無進行，結果……，故所教精我：做盡聽老公介話無無錯，佢正經係世界上最有遠見、最聰明介男仔人。

這下，老诶正來學吹匒，「路愛一步一步走，飯愛一口一口食」我放慢腳步按部就班，毋使急於求成，「身為客家人，無忘祖宗言」，有機緣乜愛傳承發揚摁介客家文化正好。