取自 風信子攝影 野渡無人舟自橫
當無法跟著計畫走的時候
跟著感覺走應該也是不錯的選擇 ~~~~風信子
上禮拜五、六本成愛跈好友 風信子EQ團隊去福壽山農場避暑兩日。
拜一老周轉來台北,我邀請佢共下山頂尞尞啊。
吂知佢講:
[我無興趣,愛去你自家去;毋過,風搓愛來咧,恁樣上山會分人愁。]
又加妹仔計畫拜六一打早愛同佢共下轉通霄看望阿媽,
黏時我就同 風信子會失禮,講無愛去福壽山農場咧。
對朋友立場來講,我毋係一個有信用个人;
對我自家來講,我跈等自家个感覺決定吾个行踏,
也係一種當湛个自信。
因爭
一路里來,我毋係一個做事有決解、阿煞力个人,
輒常事前出爾反爾,事後愁這愁該,當得人惱个性體,
我自家就惱自家這種[後悔]个性格。
這擺恁講話無算話得失朋友个決定,我無後悔。
拜六朝晨,等妹仔睡到自然醒,食咧朝,啉咧咖啡正出門。
人算不如天算,一上高速公路就塞車,
平常時最遽兩點鐘就到个這滿足足多開仔一點零鐘正到通霄。
家娘一儕人汗流脈落在灶下用飯甑蒸糯米,講愛䌈粽仔,七月半愛拜阿公婆。
[係知你兜會轉來,我就毋會選今晡朝晨來䌈粽仔。]家娘恁樣講。
佢就怕吾老公唸佢,喊佢毋使恁辛苦,愛拜喏用著買就好。
既經11:00點零咧,吾大个小娘姑兩公婆渡等孫女也轉屋下來。
[今晡日係七七情人節,係有情人南北來相會。]我同吾姑丈講。
小娘姑朝晨7:00就出門陪厥老公去醫院抽血,愛例行門診用,順續轉妹家看哀仔。
佢兩公婆去厥妹仔親家梨仔園載仔10箱(16斤裝)水梨來分哀仔做等路。
熱天灶下煮食,親像在火爐堆裡背焙共樣;
雖然肚屎枵到凴背,乜愛刻耐仔堅耐下去煞煞定疊煮分人客食啊!
隔壁五叔倈仔、妹仔、孫仔做盡轉揫揫去餐廳食晝慶祝88節,
毋過,請我去餐廳食飯也無係我愛个,
故所,在屋下儘採煮熟來過餐最好。
打幫有人客來,正做得煮較多樣个菜好來塞嘴空。
食飽晝,泡茶、啉茶,打嘴鼓、講八卦,已久無恁暢樂哩!
家娘偷偷㘝㘝仔摎暗餐个菜擇好、洗好,分我利便好落鑊,
點等大燈籠就難尋恁好个家娘!
等我煮好暗餐,佢黏時阿𧩣我:[還慶哟!恁豐沛!]
歸日下來捩捩轉無一時閒,
我還第一擺同對面被骨店師傅娘个滿女熟識,
佢嫁在屏東,一年轉妹家五、六擺,自從無識堵著。
佢也係轉妹家慶祝哀仔个生日摎慶祝88節,有爺有哀就係幸福啊!
等暗晡頭10:30睡在眠床頂,正知腰骨痛。
第二日,妹仔陪阿媽坐尞,阿媽同佢講古,
我在旁脣聽著一息仔,
感覺心肝肚當燒暖,
等變做孤栖个老人儕時節,
敢有子孫陪談哆呢?
留言列表