close
16/12/17(六)
今晡下晝係客家筆會新書發表會个大日仔。
從來理事長阿堯哥會通知消息分𠊎,
毋會強逼𠊎定著愛參加。
𠊎前禮拜就有按算愛參加,因爭這兩年中央有參加三本文選文字校正个工作,
故所這禮拜就無轉通霄。
前一暗晡同事好友問𠊎天光日愛去士林官邸看花展無?
佢有駛車仔載𠊎兜三儕異利便,當然當湛。
𠊎當暢自願準備朝,削果子、買咖啡。
就先停車在雙溪公園脣,在公園八角亭食咧朝,正行過去士林官邸。
久無來雙溪公園,大王蓮既經無咧,單淨茶花同艷紫荊花樹開等花定定。
頭擺入來愛收門票,這下開放全民共享,就係民主進步个象徵啊。
這下,就跈𠊎dinˊ一輪,欣賞雙溪公園个清幽:
親像鴨嫲个奇石
一池寒天水漣漣
可比朋友送我情
紅花樹頂鬧煎煎
福摩沙四季如春
亭台水榭橋相連
湖心亭項桌凳坐
湖面如鏡倒影清
人間遶尞像仙境
紫藤架頂花吂開
來年春天正來看
又有石空好鑽窿
短短一截乜過願
出空另片有大門
兩片出入真利便
回頭望該細磅窿
人工做假假也真
大門門背有便所
仙丹花前好風光
行前回頭望一眼
等下愛轉再過來行一輪:
行轉時節日頭出
天時恁好雲恁靚
彎彎拱橋係天弓
你來我往來會面
抵日擋雨有長廊
蘇式庭園有模樣
有閒來這做神仙
一日半朝好過日
你敢識坐半晝邊?
保證鬆爽心花開
打爽陂塘水較淺
冬下時節就恁樣
老榕樹大嫲牯頭
青葉榮榮斜斜橫
前後停跎點零鐘
難忘雙溪好光景
行出另片一扇門
歡喜坐車轉屋下
恁仔細
承蒙你
感恩 松竹軒贈詩:
老榕探水映池碧
拱橋臥波跨雲天
奇石擬象增佳趣
山茶盈芳暖冬妍
文章標籤
全站熱搜
留言列表