阿芳心曲

師生倆共乘一條[跳繩]搞[跳索仔]。

最高次數，一回38下。

昨晡日學校通知吾个客語教室愛從一樓搬上四樓，最高一棧。

𠊎既經爭取無愛搬上樓頂一禮拜咧，學校有歸下全盤考量，包尾總務主任親身來同𠊎說明請𠊎愛配合，搬上頂樓去。該食人个頭路當然就[恭敬不如從命]，仰有毋搬个道理?

堵好四年生个小朋友樂意來𢯭手，毋使半點鐘就摎家伙搬上四樓教室，恁樣同海陸腔、大埔腔教室連做下，先生、同學較有連絡，也係美事一項。

當初聽着搬徙个消息十分艱苦，驚怕[改變]个毋慣，無想愛停動一下，到高不將哩，一下半手就OK哩。

停動改變正係重新出發的開始。𠊎開始愐想上樓以後，上課時節定著會較恬靜，毋會有恁多過路人來來去去，也毋會有運動坪打球上課噦噦喊喊个吵鬧聲；日日上下樓行一輪做運動乜異湛，恁樣𠊎又期待遽遽開學，分𠊎生活定疊有規律，感恩感謝。

今晡朝晨去學校同選手小朋友共下研讀朗讀稿，一點鐘讀兩篇也異遽，自家渡咧三年个細阿妹仔煞猛肯學，𠊎就感覺生趣好搞。當晝轉來屋下，同事孟芳寄來朗讀錄音檔助陣，實在多謝。大家互相𢯭幫，這種感覺最貼心。

昨晡下晝䟓䟓去客家主題公園聽 台灣客語教師會榮譽理事長莊陳月琇老師个[客語拼音]入門簡介个課程(二)，上一擺無跈着這擺又赴毋掣，2:00恅着2:30到5:00，下二擺7/13下晝定著愛準時。

感謝  台北市客家女性發展協會主辦這連續幾次共學个機會。

莊陳老師深入淺出全盤整理一儕一本講義，佢大半生人為客語教學煞猛打拚，研究拼音整理打字到這下目珠就搣壞忒咧!這兜客語復興个先行者，分人十分感心感動。

恁仔細

承蒙大家