阿芳心曲

20140521(三)  農曆四月23   時序【小滿】

講係教小朋友學客家話，實際上我自家學習當多客家語常識。

教了第四年，正開始對舊曆農民曆頂項个24隻節氣，有兜仔感覺。

[立]就係開始个意思。一年四季个開始第一隻節氣名字就係:[立春]、[立夏]、[立秋]、[立冬]。

新曆5月初6，[立夏]，表示熱天正式來到了。

今晡日5月23，係熱天第二隻節氣[小滿]，

接下去，6月初6[芒種]、6月21[夏至]；7月初7[小暑]，7月23[大暑]。一季三個月，六個節氣。

[小滿]意思係講:穀物開始結穗，即將豐收滿盈，所以叫做[小滿]。通常這時也進入梅雨季節。

老古人言:[立夏小滿，雨水相趕]，係講[立夏]、[小滿]之交，雨水多，係梅雨季節。

現時，台灣人大部分毋係耕田絡食，

故所教細人仔記這24節氣無麼个道裡，毋過我自家加減背背啊較毋會老年癡呆啊!

昨暗晡我又無準時10點前睡目，宕看電視到12點翻點正上眠床，

反躁睡毋落覺，窗門背个雨聲大到會驚著人，天公發譴用大面盆倒下來个水會嚇著大自家。

吾老公昨晡臨暗仔正轉通霄去，因爭老哀仔一儕人孤栖到屋下，越想越毋妥當。

我逐暗晡七點邊仔同家娘通一通電話，外勞偷走這一禮拜較加，佢心情有還好一息仔，

上禮拜五吾老公帶佢去胸腔科檢查，和和仔，先生有開[抗憂鬱]个藥仔喊佢早暗愛食。

本成我昨晡臨暗仔乜有想愛跈老公轉去，毋過台北妹仔也愛陪伴，還臨時答應今晡日

同好友去民權國小代課，就忍下衝動放吾老公一個人轉去。

今晡朝晨8:21台北地動 ， 有感3級，搖有一、二十秒，我堵堵在食朝。

今晡朝晨9:00邊仔，傾盆大雨，異久無堵著這擎大支遮仔就難擋个大雨，

看路項細阿姊時行个著等到腳膝頭恁高个水靴筒，當利便，我跈眾就跈毋著，

也毋使跈時行，落大水就盡量無愛出門就好，這滿答應了人斯無奈何，雖然[鬼天時，打狗就毋出門]。

代課一節課40分鐘，前後花忒點過零鐘，還拚到活動中心市圖書館去還書。

轉來歸身悿，一份報紙吂看忒，12:00邊先去橫眠床，一覺睡到下晝兩點，正hong起來煮晝食晝。

我同家娘講，我老公在通霄我較自然，兩子哀好過餐，加佢一儕添加當多麻煩。

吾家娘當細義，緊逐吾老公上台北陪餔娘、妹仔，其實佢無了解吾个心。

請欣賞   【阿春店】个[串紅金珠]  :(珊瑚珠)、(珍珠一串紅)

恁仔細

承蒙你