昨晡朝晨打早6:48松山火車頭坐山線自強號南下，中壢上來一位熟事个後生阿哥，五叔个倈仔阿彬坐在吾隔壁空位。在竹南盤車，換坐海線區間車。一上車，列車長驗票，看着阿彬師大服務證兼悠遊卡，講:「老師好」原來這後生車長係師大工業設計系畢業个，佢(他)選擇鐵路特考，可見這下公家頭路大家相爭愛，教師甄試命中率可預不可求。
𠊎(我)這半年來，逐擺轉屋下，就會買兩三十隻生鴨卵做溏心卵，親戚朋友隔壁鄰舍食過个人做盡阿𧩣講好食。今晡日買鴨卵同雞卵花忒226個銀，通霄割價一斤鴨卵長透45，雞卵上禮拜24起到28，講係風搓影響个，還會繼續起價。結果，這擺煠鴨卵忒過久，過熟咧，無恁軟Q，算係失敗个作品。毋過，還係分享分隔壁个五叔，厥个心臼同𠊎講:
「大嫂啊!毋好輒輒拿東西過來，𠊎無東西分四姆(我婆婆是她四伯母)食。」𠊎講厥家官好食，便宜東西，毋使細義。佢(她)應講:
「佢(他)正(才)食一粒定定，乜無食多。」
「無相干，你兜(你們)做得食。」𠊎誠心回答。毋過，心肝肚當無歡喜，親像分佢(她)拒絕咧好意。再過講:
「你係講有好食个，拿一滴分若个(妳的)四姆食，佢也會當歡喜。」唉呀![言]重咧!𠊎又算哪支蔥仔?恁樣个口氣，就像𠊎係老大!
今晡朝晨本本渡吾家娘去苑裡李綜合看皮膚科，陳明仁主任醫師講厥个香港腳同灰指甲至少愛一年正會斷根。逐(每)禮拜都愛去。阿姆哀啊!黴菌黴菌真頑強!看好先生，𠊎渡家娘去買一雙san-da-luˋ涼鞋。
試著鞋个時節，又發現了厥兩片腳目珠脣就有一隻著傷个跡痕，唉哉!講麼个分硬眠床枋靠ko着个。實在傷腦筋，老人家親像嬰兒仔，一分一秒就愛注意等。
連等兩禮拜轉通霄，去隔壁看望五叔好多遍，五叔都在該睡目，毋敢去吵佢，轉來台北正打電話同佢問安，佢講歸身懶懶[提不起勁兒]，佢細吾家娘三歲定定，車禍過後半身不遂，一兩十年坐輪椅，請外勞奉伺，前一駁仔十二指腸出血入院歸星期，𠊎無去醫院看佢，佢講佢做得理解。
另外厥个二姊，彩雲姑姑既經90歲咧，係這三位世大人中央最勇健个，本成講愛申請外勞，想想仔又毋盼得，佢乜共樣一隻月領有月退俸个退休先生，還恁省儆。
吾家官个兄弟姊妹，除忒日本个三哥同美國个六叔兩公婆四儕人，通霄就伸二姑、吾家娘、五叔三位[長老]咧!祝福大家
平安快樂 康健到老
留言列表
