7/2黃昏大雨、日頭雨過後，稍縱即逝个天弓(彩虹)
已久咧，差毋多年零咧！無轉外家過夜。
昨晡日16/07/02(六)舊曆五月二十八，係吾姆个冥誕。
佢既經過身十三年咧，佢新曆个生日就也係吾爸个忌日。
這係當奇妙个恁堵好。故所，每年个0713這特別个日仔，我對爺哀个思念最多。
七月初一我台北牙周科預約洗牙齒了，就煞煞到台北車頭轉運站二樓坐透當晝十二點發个國光號，四十分鐘正發一班車，前班11:20正走啊忒，無赴着準堵好，這班同下一班12:40个共樣愛斡到林口去，無直接上中山高速公路駛，故所一抹煞就係上帝个旨意，坐中央12:00个最遽到。故所，會堵着吾陳屋共祖公个鳳嬌姑。
等車時節就開始打嘴牯，上車坐共下一直到下車，親像失散一生人个親人綹麵線綹毋會忒，其實係頭一擺見面。佢26年次，嫁分大八歲公務人員高級外省人。佢三聲帶，學老話講到比客語還較湛，拿出兩張名片分我。淰淰个頭銜看到我目珠花花，總講佢係一位大腳士，係客家婦人家做得打頭名个。
下晝我自家戴在老弟个屋下，感覺屋肚29度比台北室溫31度加當涼，台北親像大火爐堆，恁多人熻共下;莊下人少空氣好，感覺還像避暑。臨暗仔去尋前格友LKK 阿郭姊，佢堵好煮好暗餐洗身了，在該洗衫，黏時陪我談哆咧點過零鐘。斷烏咧，吾老弟兩子爺正下班。
暗晡有塑膠公司說明會在湖蓮宮舉辦，經濟部已核准設廠，居民抗議敢有效?廠方講愛發分每儕5000個銀，保證毋會污染，生理人个保證敢相信仔得?
昨晡朝晨打早日頭就恁烈，去對面國小dinˊ兩輪，行去初中同學阿姝屋下聊，佢講我從細到這下無變，本本共樣，這係虛華个恭維!其實佢面型身裝完全共樣，還留長頭那毛，毋過頭那毛染過个定定，本本後生樣仔，係對面國小先生退休个，吾妹仔小一楔學个啟蒙先生，一學期忒打好基礎正轉上台北國小。
10:30準時到阿公婆廳下，等仔塞車个細老弟足足有一點鐘久，拜忒跌筊，問吾姆有歡啊喜無?笑筊過正聖筊。
在紅發小館食晝，九儕人食到飽𩜰𩜰仔，本成想愛去造橋南瓜節參觀，天時烏陰到當得人驚，驚怕響雷功打風馳毋敢出門，下晝三，四點邊仔斷真拚大雨，雷公貢貢滾。聽講上禮拜頭份落大雨響大雷公，同阿棟叔大門个鈴仔同電視都打壞忒;老弟學校電腦个伺服器也分雷公打壞好多台，一台好多萬箍來修理，哇！損失嚴重。
天年各變，今年天時盡搞怪!最近打風馳響雷公特別多，祈求
台灣風調雨順，國泰民安。
留言列表
