吾家娘前兩暗晡可能睡毋落覺,既經11點咧還打電話來同吾
老公講:「你六十歲个生日到咧!愛同你做生日。」「我舊曆个
生日早過忒咧!毋使麻煩!」聽著吾老公回答厥姆。
客家俗外家愛同婿郎做31&51出頭;學老人做30&50齊頭ceˇ teuˇ。
佢51時節,我外家阿姆堵好正過咧身,老弟毋曉得,等到佢
兜51時,厥外家摎佢做51,佢正愐著愛同兩者姊丈補做61。
其實,我兩儕全無信這兜俗,這下時代進步、醫學發達,逐
儕乜長壽富貴,日日就係過生日,何必來這一套呢?
拜託!老弟、老弟心臼,我兩公婆心領咧,千萬毋使恁仰「食
古不化」哦!
話講轉來,今晡臨晝仔(今天晌午)吾妹仔出去圖書館轉來,買
咧一細垤cheese雞卵糕同一條豆奶吐司,祝福厥爸「生日快
樂」。我暢到放肆仔笑到腸仔差一息仔打結!
臨暗仔(傍晚)吾小娘姑5歲个孫仔打電話來「舅公,生日快
樂;您愛來吾屋下食雞卵糕無?雞卵糕分我食淨淨咧!」還得人
惜个5歲仔,希望過兩日掛紙時節,做得見著一面。
今暗晡該下7:30邊仔,遠在印度个倈仔也來電祝賀。做阿爸个
關心問:
「哪央時做得轉?......本成兩隻月轉一擺,這下嗄變三个
月。」
「生意好無?公司有賺錢無?」
看樣子斯無幾好!連中鋼舊年第四季就無賺錢,下游細公司做
生理無恁胲!可能滿一年,就愛撤崗結束。
後生人有心煞猛打拚,環境時機乜異要緊。加油!天無絕人之
路!「心專石也穿」頭擺吾爸輒常同我講這句話,希望倈仔你
盡心用力就好,第一重要身體愛顧好。感恩
祝福
留言列表