春不老 結實纍纍!
燈籠花 裂狀似楓的葉 橙紅白紋燈籠花型
親家且姆
十二寮休閒農園食晝
改菜地
吾最親愛个兄弟
這擺轉去珊珠湖外家歇兩暗晡
係臨時決定个
毋過
百項煩勞放開開
同兩隻老弟、老弟心臼共下看電視、打嘴鼓
心肝頭異燒暖
感覺[放下、放空、放開、放鬆]也無恁困難
上星期五臨暗晡跈吾老猴轉頭份
堵著馬總統來頭份徐耀昌立委競選總部造勢交通管制
好得張主任餔娘阿碧雲帶路經東興橋
在河背轉124線先去斗煥坪
在張主任大堂屋(豪宅)戴到7.8點
自家用行路行到珊珠湖車頭脣表妹屋下
恁久無看到
兩姊妹親膩膩天南地北講無煞
難為佢百項擔頭自家
最近講麼个血壓無異正常
乜血糖、血脂肪異常
佢正細一歲 一路里來注重保健
無想到這下健康亮起紅燈
確實[人無千日好,花無百日紅]
兩日搵在吾老弟屋下
分兩位老弟心臼奉侍[茶來伸手,飯來張口]
這種清閒命斯愛轉外家正享受咧到
盡感謝恁感謝吾个屋下人對該款待
星期六該朝晨
一儕行屋後背[頭份後花園]行到[老崎]
看到靚靚个燈籠花
摎人討著三梗,拿轉外家&通霄插
毋知會生抑毋會生?
順續去路唇頭[親家](叔伯老弟个丈人老)屋下坐尞
親家罹患攝護腺癌
消瘦一大圈
也[失智]毋識咧
且姆100年苗栗縣模範母親正接受表揚過
佢同講
親家著病有心理準備
厥大妹仔个獨生子31歲留外碩士
旋風在自家阿爸个工廠分疊高个貨品磡著
三分鐘就無命
正係正經个心痛
這外孫從細係佢度大个
雖然且姆大倈子今年升了教授个滿足歡喜
也補不了這心肝痛
這位且姆盡有修
生有7女2子
隻隻成龍成鳳 家庭幸福美滿
子女有請外勞照顧兩老
佢還整菜園種當多菜
逐擺轉去佢就會送菜分兜食
該當晝
分阿棟叔、叔姆去十二寮請食晝
世煥哥開車 叔影嫂買當多名產等路分
坐車遶峨眉湖一輪,還買[羅媽媽菜包、發粄]
分人請又有等路拿
正經安到[六月个牛眼----白核(齕fudˋ)]
臨暗仔,同兩個老弟心臼大家共下改菜地
講愛來種菜
因為係頭擺个老菜園
又正落過雨
故所泥鬆鬆當好改
煞煞番薯梗插落去
當遽就有番薯葉好食哟!
等到星期日臨晝仔正轉通霄屋下
老家娘既經煮好飯菜 領便食
歸年度無看到个小娘姑渡大妹仔撩細个倈仔來食晝
看著肥嘟嘟个小六生已經挷相抽長咧!
好得毋會忒大箍!
該吾外家孫肥到毋使做兵
到底係陳屋有大箍種抑係佢自家無慶嘴?
以上係這[美麗的週末]个[美好得過程]
承蒙大家
恁仔細
勞力