國慶三連假,最適當个轉老屋時節。
尤其正讀咧獅潭 王春秋个詩集《轉屋,春秋》了後,
更思念外家阿姆摎一切。
毋過,前幾日仔可能吸著冷風,身體無異鬆爽,
10/08放料个第一日,十點半邊仔還在花園搣漦搣濞時,
細老弟來電講,佢歸屋人既經轉頭份珊珠湖咧。
喊乜轉屋下,等食夜哦!
同吾妹仔參詳,佢本成考慮同共下去[舅舅家]--
佢對歲以前係姐婆同大舅、大舅姆渡个,
雖然姐婆過身咧,佢對大舅个屋下有一份特別个親切。
結果倆子哀就懶頭,
因爭愛坐車轉頭份,兩儕也有寒著,
歸身軟怠怠,故所懶震動。
打電話同係老弟講,當然佢免不了失望,
從五月節前俚四姊妹會面過,到這下還吂再牯見面,
係阿姆還在時節,根本不可能个news。
親如手腳个兄弟姊妹,結婚了各顧各,
阿姆係大家思念連繫个中心,等到爺哀過身咧,
自家身體又無華麗,自然就冷淡下來。
細老弟今年11月就滿50歲咧!
佢一隻目珠最近有狀況,漸漸看毋著,
眼科檢查無問題,10/17安排林口長庚顱內神經檢查,
愛等10/27正知結果。
聽著這消息,免不了替佢愁。
萬一有三長兩短,三個還讀等書个細倈仔愛仰結煞?
人過半百,愁樂摻雜,
仰般正係王道正確,
你敢有把握?
就10/8該暗晡,
同妹仔在電視新聞看到一則[花蓮公路大石牯打著小客車]新聞。
畫面頂項一個生來盡得人惜个細倈仔接受採訪,
講佢親眼看著大石牯擊著後背輛車仔个經過,
一口流利个北京話,分人側目,
「這係中國來个細人仔」吾妹仔吂講煞,續等又喊:
「這毋係細叔婆 謝瑞玲!?」
原來畫面轉到一個身著烏T恤个婦人家,佢講:
「事發突然,我們在前一輛的車飽受驚嚇,
我一直念阿彌陀佛,雖然車全砸爛,但人平安」。
係啊!係个細叔姆摎厥細外孫啊!
打電話分吾叔姆,果不其然就係佢兜。
佢倆公婆頭份上來,同妹仔會合,
一台小自客愛同花蓮繞轉台中,
吂知「出師不利」!
呵 !
人生啊意外免不了,
有命就好偷暢 !
還愛同上帝要求麼个呢 ?
祝福大家
國恩家慶人平安
恁仔細!
承蒙你!