阿芳心曲

時間：2011/05/21  下晝2:30~4:30

領讀者： 黃永達 博士

主持人： 張淑玲 老師

列席：林賢亮、黃子堯夫婦、徐碧琇、劉慧真、許瑞琴、李漢華、李碧珠、邱逢正、左春香、陳淑芳

主持人開場：

    今晡日「客家筆會」第一擺自由形式个座談會開始咧！有請黃教授來領讀。大家對黃博士識著有伸哦！佢從資訊工程轉到客家文學个領域，係一位盡優秀又有心个前行者。順續仔，感謝碧琇同張先生布置恁有氣氛个位所，分兜使用。

領讀者  黃永達：

    座談主題係舊年第一屆桐花文學獎，筆會兩篇入選个作品──張捷明＜十面桐花＞，莊華堂＜白色季節＞，佢兩儕得獎易無簡單。張捷明全篇用盡烏个客語來寫，莊華堂華客摻等來寫。希望在座各位，愛有「攻佔山頭个目標」──多多參加比賽，乜愛有志氣來得獎个目標，大自家盡量用客語來表達啊！

   張捷明＜十面桐花＞得到「散文類」佳作第一。嚴條講，有「十二面」，佢分14部分，用「詩仔」个想法來寫，有「散文詩」个味道，用「擬人法」從「桐花」个各面向、各角度來書寫。

    莊華堂＜白色季節＞得到「短篇小說類」佳作第三。這寫該係南庄个故事，客家人、賽夏族恩恩怨怨，當「寫實」，拗蠻有意思，莊先生對客家文化異熟絡，感情盡醹，表達異豐富。

    寫小說全部用客家話來寫，無恁該！係講文學這兜藝術創作離不開「共通語言」──就係「興趣」，像阿堯哥本成係模具工程師，仰會行在這客語書寫个路項呢？

劉慧真：

  聽玉嬌採訪桐花文學獎个評審，林黛嫚、吳晟……佢兜毋識客語，吳晟講：「看就知」，佢憑厥感覺用揣仔來看作品个愐法，恁樣敢有準？

張淑玲：

    這講著吾心肝肚，舊年「中箭落馬」，就單淨譴到心肚無位好講。係講評審毋係客家人，佢對作品後背个客家文化做盡毋知个情況之下，分人判生死，難免造成「遺珠之憾」咧！講「看字就知意思」，忒潦草兜咧！做得分人「反面思考」一下。

李漢華：

    堅持客家文學獎愛用客家話來寫，仰仔思考就仰仔書寫。國立教育大學台文研究所所長向陽識講過：「創作者毋會思考到市場取向，係仰般个」。

劉慧真：

    二十年前就用客語寫詩仔，吾客家創作慣勢用客家語寫。毋過，電腦時代客語書寫有障礙。除了造字檔，流通方面乜無利便──對方無一定有輸入軟體內件啊！

李漢華：

    過渡時期，用教育部頒定客家用字，摎漢語通用拼音來寫。

邱逢正：

    客語用字大家做得來吾「台灣教師協會」網站下載使用。各位有靈感就煞猛寫出來，你得吔獎三擺就會變評審。三頭兩日，敢有恁簡單？吾婆輒輒講：「一日無講古，三頭兩日就背了祖」。

林賢亮：

    係德文系出來个，堅持「先有話，正有文學」。大一、大二練習語言，大三、大四正讀文學。先寫詩，再寫散文，再過來寫小說。

劉慧真：

    莊華堂＜白色季節＞得佳作，做得咧！佢這篇忒過多个歷史訊息，妨礙吔厥小說个結構。題目較無適當，毋知所講係麼个；題目摎內容硬仃仃，無明顯个「意象」；講愛情因為族群有阻礙，台灣相對日本，這方面忒硬。歸篇仔愛講个事情忒多咧！還有愛表達个感情忒太複雜，包含原住民、客家族群、學佬人摎日本人，還有三代之間恩恩怨怨，實在愛用「長篇小說」來處理，正做得。

張淑玲：

    係分莊先生充足个內容空間來寫這篇，相信會係當好个作品。𠊎來分享張先生个＜十面桐花＞，這篇結構有一息仔鬆散，假使講十二條寫作个思考路線，較平均兜仔較理想。佢對桐花盡有了解，文章裡背个用字用詞、描寫个意境，都相當有水準好，評審應該分佢還較好个獎項。

左春香：

  無看著其他篇得獎个作品，做毌得比較。＜白色季節＞講男女主角在緣份項像有吔無个感情，還有最後發現兩儕竟然係「同父異母」个命運安排，分感覺到底桐花獎个標準係恁吔？評審个看法摎心態又係麼个？

劉慧真：

  俚單淨就作品本身來討論定定。

黃永達：

    慧真分析當有理。

劉慧真：

    對「油桐花」，吾生活經驗無半滴仔。係「雪」？聽一位電台主持人講過，厥阿公、阿婆對該桐花飄到歸條路个白白淰淰，對生計無任何个幫助，故所無半點好感咧！

張淑玲：

    二十零年前，我同吾先生交往个時節，第一擺在台三線看著「五月雪」，就對佢个「靚」有盡深个感想。這係客委會營造出來个，花靚摎土地感情，下車兩腳貼著地泥項去行，就有感覺。這種分人難忘个美好經驗，最先係分人有一息仔勉強，毋過最後嗄變成全臺灣盡靚个客家印象。

劉慧真：

    對桐花，再聯想，再去寫出創作，當多人工去種。阿淘哥講，客委會做著當成功。毋過，新北市客家文化園區个老樹剷除徙走，換種油桐樹，這種人工化个桐花路，係一種「不可承受个重」。對這種个文化愐法，到底係愛讚揚？還係愛檢討？

   「桐花獎」，佢比賽个目的還有創造个意象，到底係白雪、愛情、美麗、土地、感恩？

   「桐花『祭』」摎嘉年華形式，有文化族群退化个危機，漸漸仔行到淺碟文化去咧！日本時代桐油做油漆，樹梗做屐仔、番仔火箋，范文芳个新詩＜油桐花>，可能詩人還細時節捻過桐子。所以就單淨唱歌跳舞，顯毋出原本政府造林計畫个推廣，鼓勵大家種油桐樹，無愐著投機販仔想愛用油桐來摻假，替換梧桐樹銷去日本，嗄分日本人識破價樹大落，再加化學合成个原料乜漸漸替代桐油，故所，失去經濟價值个油桐樹，就在無意間變成現下開淰山坪个「美麗的錯誤」。

左春香：

    葉日松先生童謠<油桐花>，就係有詩人童年个經驗，佢在油桐樹下發个夢，係無管別人仰般想，就恁樣逍遙自在──「帝力於我何有哉」？

    何石松博士乜識講，頭擺「油桐花」係注重在厥產業價值，歇在山肚个窮苦人根本無心性去欣賞；這下，人食飽太閒，正營造恁「牽強」个「美麗个錯誤」──同台北「義民祭」共樣，公部門辦理，就失忒該味緒咧！故所，有「北油桐、南夜合」个講法。毋管政府抑係外力來主導，有好有壞，俚愛講乜愛寫。

劉慧真：

    像「台灣文學館」客家獎，三年正輪一擺，隱隱感覺著，客家文化經營，分人放在體制文化邊緣，大學院系，無正經个「客家系」。吾个書寫，除咧攻佔山頭係目標以外，乜愛寫歸個客家，大家共下來較煞猛兜吔！

    教育部隔年辦理个客家文學獎，吾有一首傷悲有關228个詩仔，嗄分佢兜配等客家歡樂个歌曲，本成𠊎愛表達个感情，就走忒咧！負責這兜事項个工作人員，也無愐著愛問一下作者个本旦意思，就大主大意去安排，實在還無結無煞！

黃子堯理事長結論：

    公部門舉辦各種客家活動，營造有客家个情境，大體全係因為選舉政策个關係，這樣行下去，就容易造成像禾串仔共樣个「邊緣化」，客家人个位置在哪位？就像今年「桐花祭」簡化儀式，變成「桐花季」咧哩！

   再講，鼓勵客家鄉親，可以盡力去寫文章，假使無發表過个作品，就做得拿去參加比賽。毋管自家感覺寫吔好還係毋好，就分讀者自家去讀、去評判。所有𠊎有下背幾點个感想愛講：

1.     兩篇比較，張捷明<十面桐花>係小題大做；莊華堂<白色季節>係大題小做，這係兩儕表現手法最大个差別。

2.     用桐花做經驗，捻油桐子賣來過日仔个時節，歇在山肚个人正有看著。油桐花有毒，跌在地泥項滑滑會溜人，該央時，屋下無心性種，仰會上山看花呢？隨時代發展，這下人會種、會培養、會欣賞，這全全係人為製造出个。

3.     「桐花徵文比賽」用相片摎500字說明。公關公司請作家季季、葉日松摎共下作評審，毋係全部都有客家背景，恁樣敢適當？過再講「台灣文學館」詩組評審，曾貴海、利玉芳摎𠊎三儕，一共有19篇，曾貴海識想愛取南部陳寧貴个文章，毋過毋同意，因為 陳 先生係用華語翻作客話个方式來寫，故所，感覺任何關於客家文學个比賽，最好由客家背景个評審，較理想。

    文學最餳人个特性，就係精神摎語言个力量，所謂「語言文學」就係恁樣！過渡時期，做得華語翻作客語。像<白色季節>，華客併用，雖然內容裡肚有客家元素，毋過盡打爽，嗄少吔客家語言特有个味緒摎力量。雖然用客家愐法、用客家話、用客語字來寫，可能速度會較慢，毋過無相干。就像現時个徐兆泉先生，去摎《小王子》這本書翻作客語，乜對客家文學，有盡大个貢獻。所以無論聽、說、讀、寫、作，都盡需要有心个客家鄉親，去投入、去試驗，肯去寫、肯去嘗試，恁樣客家文學就有希望。

 *************************************************************

  後記: 

以上桐花美照取自格友 陳老師<2011桐花>  感恩!