阿芳心曲

時間:2011/05/01朝晨頭10:00~12:00

地點:北市客委會一樓

主旨:客家才藝演說會處女秀

貴賓:學生家長林紫晴个媽媽

宋瑞娥老師多才多藝  會裁縫、唱山歌、教拼音、教拼布、唱歌跳舞逐項就會

吳上恩小朋友特異功能~過目不忘表演  厥姆  美成老師繫厥个助手

詹老師表演雞胲仔造型

難得今晡日放尞──學校舉辦「母親節才藝表演」，鄉土母語停課一日。

雖然一禮拜正一日个國小鄉土母語教客家語个課，乜加加減減有一滴仔壓力，因爭自家客語能力無異壁，驚在課程進行肚有出差錯，該就誤人子弟咧！

我當幸運摎幸福，學校盡尊重資源先生，對教學資源个供應「有求必應」盡週到。

上禮拜二教學組長交代講，五月底以前愛舉辦「閩客語字音字形競賽」，喊我兜出題，佢連題本就提供好勢，兩下半仔就交差了事，恁承蒙雅慈組長勞心勞力。

5/1(日)臨晝仔在北市客委會舉行个「客語才藝演講會」，也感謝紫晴母女、美成老師母子，好友季珊老師，鑾香老師，瑞娥老師共襄盛舉，完成了演講會个處女秀，恁多講無出嘴个淰淰个感謝在心肝肚。

愛知「萬事起頭難」，一件活動盡著愛當多人个支持、響應正做得功德圓滿，係無創辦人陳新弘理事長个堅持理念、出錢出力、跳上跌落、四處張羅，就無該晡日个光景。

當多關心阿芳个鄉親勸話我，既經退了休，做一個清閒人較好，毋好搣漦搣濞，屎著dauˇ歸身洗無淨。

最感謝恁多朋友先生个相惜，阿芳愐著doˋ自家一生人無出益，這下為著這客語傳承个目標，做就著cog咧(做就對了)！你講係毋係阿？