阿芳心曲

成時

一儕人食飯盡無結無煞

煮少

輒輒愛動火灶   無恁"大身"

煮多

強強會撐肚   異無衛生

故所 逐擺屋下伸著我ㄧ儕个時節

我就將就儘採食  

有好飽肚就做得

煮三笐"十榖米" 放"保鮮盒"在冰箱

愛食多就添幾多溫燒

可以食一禮拜

青菜就愛食正炒

烳一鑊爌肉乜做得食成十日

你看

頂背吾个過餐

有卵、有肉、有青菜

一儕人食飯也顧著營養足

這紥蔥仔   分我心肝肚盡燒暖

係3/13(日)該朝晨

頭份吾老弟隔壁鄰舍  乜係吾叔伯老弟个丈人哀

我喊"且姆"个彭太太送个

該朝晨打早佢遶菜園轉

工摘兩大紥"大陸妹"摎"杓菜"分吾老弟心臼

一看著我在屋下

黏時又倒轉去菜園

捎芹菜、杓菜、賣仔、蔥仔分我

佢用報紙包好

還在籃仔肚項擇一隻盡大粒个高麗菜 

塞入塑膠袋愛分我

既經兩禮拜咧

這蔥仔還浸青

市場敢買仔著恁上等又安全無農藥个?

乜感謝吾老弟同表弟車仔載上台北~

(該日下晝參加吾明舅姆个"告別式")

今晡當晝

攙吾家娘買分我个包心白、一大粒牛番茄摎一息仔木耳、杏鮑菇

爆一細垤豆腐條仔

炆"白菜滷"

放兜青蔥莖

該好味緒就我ㄧ儕"獨享"咧哩