阿芳心曲

0211/02/15(二)

這學期第一擺上課，打早無老公就載ngaiˇ到學校。

今晡朝晨學校愛舉辦【朝會】。

教學組長上學期結束个時節，既經通知，這日愛準備5.6題【揣令仔】猜謎語。

堵著落雨，故所全部學生仔企到走廊頂項，

麥克風播音無異清楚。

吾个客語令仔，講ㄟ無清無楚，連大人先生淨聽一遍，又無華語對譯，

乜雞嫲生卵__確確係【鴨仔聽雷公__做盡就聽無】。

有一個三年生个學生下晝第一節上課時同ngaiˇ講，

先生，你當緊張哦!講恁遽，ngaiˇ全部聽無識。

這學期，愛略略仔調整上課个方式，愛加重聽摎講个部份。

分佢兜互相練講个時間，還愛阿腦佢兜煞猛努力个精神，總愛分佢維持學客語个趣味。

下背就係ngaiˇ出个【令仔】:(一年生揣一題)

1.有隻長鼻公，食飯洗身全靠佢，又會泄水搞遊戲，功夫厲害人人知。___(動物)

2.半天吊豬肚，好食無好煮。___八月半愛食个(水果)

3.麼个生根毋落地，生莖生葉毋開花。街項市場有好買，毋過園中無種佢。___(菜名)

4.無手無腳，跳上跌落，圓身圓圓，無衫好著。___(運動器材)

5.一雙玉燕貼地飛，日裡食飽夜肚飢。___(身項著个器物)

6.兩腳吊摃晃，巴掌一去見閻王。___係{蚊仔}

   上樹毋驚高，下樹毋驚跌，挷無毛， 無血。___係麼个(昆蟲)

看倌 各位:可有興趣，猜猜看?