close
2010/10/26(二)
今晡日打早出門時節就落雨,坐518公車到「玉成里」站,下車了還愛行10空分,蹶過成美橋,經過忠孝東路,正到成德國小。
落雨澹滴,愛擎遮仔,又驚腳踏到水窪,係講鞋襪溼忒,歸日心肝就壓矺,故所驚驚險險正行到學校。入了教室,整理拼掃、準備教材同教具,續等六節課接下來,係無好體能,實在有難為!
教書毋單淨教讀書,還愛買細人仔个心,係分佢兜感覺到你當得人惱,該這隻頭路就難賺食咧!這下个細孲仔無恁好拐,軟吔、硬吔,文吔、武吔,盡好有18般武藝好來展。麼个「過動」、「學障」、「資優」,聰明、乖巧、調皮……做盡愛應付得來唷,係無何嗎死苦來為難自家?這就係「甘願做,歡喜受」啊!
教一首童謠:〈七姑星〉異喜歡,分ngaiˇ愐著當多童年个回想。
七姑星,七姊妹
打開園門來摘菜
摘一皮,留一皮
留到天光日嫁滿姨
滿姨嫁到哪
嫁到禾埕背
雞公礱穀狗踏碓
鵝㧡kaiˊ水,鴨洗菜
狐狸燒火貓炒菜
ngaiˇ七歲小一以前歇到鄉下伙房肚,童年个往事歷歷在目,真經ngaiˇ老咧,正恁愛愐想頭擺个老狗屎。等有時間正定定仔敘分你聽。恁仔細,承蒙你!
陳潔儀-天冷就回來
全站熱搜
留言列表