2010/10/9(二)
朝晨前三節四、五、六年生上課時節,
ngaiˇ在粉排(黑板)頂項寫一行字:
「下週二期中考:(口頭評量)一、二課朗讀課文」。
第四節了後,一、二、三年生課,ngaiˇ就捽忒,
因為這係快樂个客語時間,一星期正一節課
無需要分小朋友壓力。
尤其一、二年生學習專注力可能無10分鐘,
課程進行做毋得一成無變。
第四節,二年生个細人仔肚笥枵過橫,
阿齊集點五張,佢同ngaiˇ換了一枝自動鉛筆,
同秉晁共樣頭犁犁(laiˇlaiˇ)仔在課本項寫字、畫圖。
奕誠乜定定低頭跈等先生唸,
妤芳也無趣味樣仔。
下晝,第一節係三年生,佢兜使用第四冊个課本,
已上過咧,故所課文當熟絡,
「床前明月光,疑是地上霜。舉頭望明月,低頭思故鄉。」
大家搶等唸,搶等唱。
過關就有糖仔食,無就一張集點卡。
補充教一首童謠:
月光光,下蓮塘
抝蓮梗,扛新娘
新娘重,扛雞公
雞公啼,扛條貓
貓會走,扛條狗
狗會……
學生仔有趣味,上課氣氛好,師生盡快樂。
毋過,最尾節一年生个四隻細天使興嘟嘟仔打早就來到教室,
ngaiˇ先分一儕一粒硬酸梅糖仔,
「阿芳姊,做得這下食無?」
該下係前一節下課時間,吂上課,ngaiˇ講:
「做得。」
壞蹄咧!該糖仔恁耐食,續下來兩個細妹仔嘴嗄擘毋開咧,
兩個細倈仔無食(一個愛留分媽媽食,一個愛留分同學食)
課文係<大象>
阿永雄問ngaiˇ:
「老師,為什麼書上畫的大象沒有象牙?」
「母的大象有沒有象牙?」阿伯宏續等問。
上禮拜教該臉部五官的稱呼全部還分ngaiˇ,
接下來ngaiˇ當認真反覆重複教佢兜,
佢兜嗄分ngaiˇ一副嚴條惡相嚇到學毋起半句話。
其實,吾个心肚明白,
無論大人細子,緊張壓力下,定著學無漦鼻。
「敗勢啦!承蒙你!恁仔細!請原諒ngaiˇ!」
· 《月光光》客家版本 1
月光光,秀才郎;騎白馬,過蓮塘;蓮塘背,割韭菜;
韭菜花,結親家;親家面前一口塘,打條鯇魚八尺長;
大頭拿來熬湯食,尾巴拿來入學堂;入個學堂四方方,搬條凳子讀文章;
文章讀哩幾多本?三十零二本;一本丟落塘,一本丟落井;
井裏起銀杆,銀杆好架橋;橋上好食飯,橋下好洗碗;一洗洗到“烏舌嬤”,拿給阿婆養雞嬤。(注:“烏舌嬤”指的是油嘴滑舌、愛耍貧嘴之人)
·
《月光光》客家版本 2
月光光,照四方;四方暗,走田坎;田坎尾,撿枚針;
針有眼,交給傘;傘有嘴,交給鋸,兩子同年學搬鋸;
搬鋸冇老婆,不如學補籮;補籮篾絲曲(刺)屎北,不如學打鐵;
打鐵難講價,不如做叫化;叫化難扛筒,不如割簕蓬,簕蓬裏一隻蛇,嚇得哥哥目來來。(注:“目來來”指目瞪口呆)(王源生 搜集整理)
《月光光》客家版本 3
月光光下蓮塘,拗蓮梗,扛新娘,
新娘重,扛雞公,雞公叫,扛條貓,
貓愛走,扛條狗,狗愛叫,
上山檢柴燒,檢分阿姐來煮朝。
《月光光》客家版本 4
月光光 吊四方 四方暗 跌落崁
崁下拈枚針 送觀音
觀音微微笑 送大轎
大轎下 兩頭禾
割三擔又過一籮
分得你來我又無
留言列表