2010/11/16(二)
該日係落水天
ngaiˇ共樣打早就䟘hong床準備坐公車出門
睡到飽飽精神當足
著條柑仔色个裙，擎等柑仔色个大遮仔
興嘟嘟仔坐上518公車
下了車，在轉角便利商店買兩條餅乾
蹶上陸橋又下崎，歸路溼溚溚仔zab zab ze ze
毋過ngaiˇ心情異好
前三節六、五、四年生進行口頭評量
該六年生个實在can dong
有幾儕根本無認真又存心搗亂
也對佢無奈何
自家自愐自解
這做毋得錯怪學生仔
你自家上課个方式同教材个說明有改進个需要
因為這班人數多 當多表面上盡乖个細妹仔混在人群中無開嘴跈等講
佢根本毋會唸課文
了解以後就愛想辦法餳佢有趣味去開嘴講客家話
好在期中有這評量 正做得加強有效个學習
當然表現好个 ngaiˇ分佢兜集點卡
有幾隻盡乖巧个細妹仔煞猛認真个態度分ngaiˇ當安慰又感動
無論如何對於客家母語个傳承摎教學ngaiˇ定著毋會缺席
五年生同四年生个狀況ngaiˇ異滿意
大體來講 師生互動麻吉个 學習效果一定當好
這種一禮拜正見一擺面个課程
先生課前个準備 尤其對教學目標同教學進行過程愛有真足个把握
正毋會誤人子弟
第四節二年生阿秉晁又寒到無來
伸該三儕乖喞喞仔異得人惜
總講帶低年生注重在做中學
無人喊「肚笥枵」40分鐘一下就過去
ngaiˇ深深感覺到「專心投入 教學相長」个迷人之處
下晝三年生个還較得人惜
10空儕大家相爭擎手愛回答
下課時節分佢一垤餅食 師生就恁歡喜
最尾節輪到一年生个小天使
吂前之間101个阿伯宏摎瑄瑄就來到教室
請佢兜食餅仔
「毋係請你食糖仔哩 故所先生毋係細狗仔」
ngaiˇ會恁仔講係因爭上星期自家發譴對佢兜講過
「係再牯請你食糖仔 ngaiˇ就係細狗仔」
自家講个話自家愛收成啊
總講 這日个母語教學「12月个甘蔗──兩頭甜」
恁仔細！承蒙你聽ngaiˇ噥噥哢哢半晝邊
留言列表
